კალიფორნიაში მიღებული ახალი კანონი მომავალი 10 წლის განმავლობაში განაპირობებს პლასტმასის ნარჩენების 23 მილიონი ტონით შემცირებას
- ახალი კანონით, აუცილებელია, ბაზარზე ერთჯერადი პლასტმასის რაოდენობის 25%-ით შემცირება მომდევნო 10 წლის განმავლობაში
- ამერიკის შეერთებული შტატები არის მსოფლიოში პირველი პლასტმასით დაბინძურების კუთხით
- კალიფორნია არის მეოთხე შტატი, რომელმაც მსგავსი კანონპროექტი მიიღო კოლორადოს, მეინისა და ორეგონის შემდეგ.
კალიფორნიაში შემოღებული ახალი კანონი SB54 ემსახურება პლასტმასის ნარჩენების შემცირებას, გადამუშავების ხარისხის გაუმჯობესებასა და პროცესში უფრო მეტ პასუხისმგებლობას აკისრებს მწარმოებლებს და არა მომხმარებლებს.
ახალი კანონით, აუცილებელია, ბაზარზე ერთჯერადი პლასტმასის რაოდენობის 25%-ით შემცირება მომდევნო 10 წლის განმავლობაში და ამ შემცირების ნახევარი უნდა მოდიოდეს პლასტმასის ერთჯერადი შეფუთვის მრავალჯერადით ჩანაცვლებაზე.
დამატებითი მანდატი ასევე მოითხოვს არა მხოლოდ პლასტმასის ერთჯერადი შეფუთვის და ჭურჭლის მრავალჯერადი ან დეგრადირებადი ალტერნატივით ჩანაცვლებას 2032 წლამდე, არამედ 2028 წლამდე პლასტმასის გადამუშავების მაჩვენებლის 30%-მდე გაზრდას, ხოლო 2032 წლისთვის მაჩვენებელი 65%-ს უნდა აღწევდეს. ასევე. იგეგმება ათასობით და მილიონობით დოლარის გამოყოფა პლასტმასის ნარჩენებით დაბინძურებული ეკოსისტემების რეგენერაციისთვის.
„ძნელია, გამოვხატო, თუ რამდენად მნიშვნელოვანია ეს ნაბიჯი“, – განაცხადა ანია ბრენდონმა, აშშ-ის პლასტმასის ნარჩენების პოლიტიკის ანალიტიკოსმა. „ამერიკის შეერთებული შტატები არის მსოფლიოში პირველი პლასტმასით დაბინძურების კუთხით, რაც, თავის მხრივ, ხელს უწყობს ოკეანეების პლასტმასის კრიზისს. ამ პრობლემას აშშ-ის ლიდერების გარეშე ვერ გადავწყვეტთ და ნათელია, რომ ამ კანონის შემოღებით კალიფორნია წინ მიუძღვება გემს. ეს ჩვენი ოკეანეების დიდი გამარჯვებაა“.
2021 წლის მდგომარეობით აშშ-ის პლასტმასის გადამუშავების მაჩვენებელი არის 5%-დან 6%-მდე, კერძოდ კალიფორნიის შემთხვევაში კი – 5%-ზე ნაკლები. კანონპროექტი მიზნად ისახავს როგორც გადამუშავების მაჩვენებლის ზრდას, ამავდროულად პლასტმასის მრავალჯერადი ალტერნატივებით აქტიურად ჩანაცვლების ხელშეწყობას.
კანონპროექტის განხილვის შედეგები ამგვარი იყო: სახელმწიფო ასამბლეაში 67 მომხრე და 2 მოწინააღმდეგე, ხოლო სენატში 29 მომხრე მოწინააღმდეგის გარეშე. კალიფორნიის გუბერნატორმა გევინ ნიუსომმა კანონპროექტს ხელი მოაწერა 30 ივნისს.
კალიფორნია არის მეოთხე შტატი, რომელმაც მსგავსი კანონპროექტი მიიღო კოლორადოს, მეინისა და ორეგონის შემდეგ.
„დღეს ჩვენ ვქმნით ისტორიას. ხვალ ჩვენ ვიზრუნებთ, რომ მივაღწიოთ SB54-ის შესაბამისად დასახულ მიზნებს“, – განაცხადა კონგრესმენმა ლუზ რივასმა.
SB54-ში არსებული მწარმოებელთა პასუხისმგებლობის კანონები ძალაში შევა 2027 წლის 1 იანვრიდან.
სტატიაზე მუშაობდა : ნინო ხუნდაძე და ნინი თოიძე
წყარო : www.ecowatch.com