დიდ ლონდონში 2021 წელს არალეგალური ჰაერის დამაბინძურებლები დაფიქსირდა

• ლონდონში დამონტაჟებული ჰაერის ხარისხის მარეგისტრირებელი 73 მონიტორიდან 15-მა ნორმატივებზე გაცილებით მაღალი დაბინძურების დონე დააფიქსირა
• „ჰაერის დაბინძურების გამო ჩემი ვაჟი საავადმყოფოში უკვე 12-ჯერ მოხვდა, ამას თან ერთვის სასწრაფო დახმარების 10 გამოძახება“, – განაცხადა ილინგში მცხოვრებმა დედამ

„Clean Cities Campaign“-ის მიერ ჩატარებული ახალი ანალიზის თანახმად აზოტის დიოქსიდის შემცველობამ ლონდონის ჰაერში 2021 წელს კანონით დაწესებულ ნორმებს მთელი ქალაქის მასშტაბით გადააჭარბა, ხოლო „ცხელ წერტილებში“ ამ მავნე ნივთიერების დონე რეგულაციებს 50%-ით სცდებოდა.

საკანონმდებლო რეგულაციების მიხედვით, ჰაერში აზოტის დიოქსიდის შემცველობის დასაშვები დონე ბრიტანეთსა და ევროკავშირში უნდა მიღწეულიყო არაუგვიანეს 2010 წლისა.

მონაცემების უკანასკნელმა ანალიზმა აჩვენა, რომ ლონდონში დამონტაჟებული ჰაერის ხარისხის მარეგისტრირებელი 73 მონიტორიდან 15-მა ნორმატივებზე გაცილებით მაღალი დაბინძურების დონე დააფიქსირა. გარდა ამისა, არცერთი მონიტორის ტექნიკური გამართულობა არ შეესაბამება ჯანმოს უკანასკნელ რეკომენდაციებს.

NO2-ის ყველაზე მაღალი დონე შემდეგ ადგილებში დარეგისტრირდა: ბრიქსტონ როუდი, ლამბერტი და პატნი ჰაი სტრიტი, უონდსვორტი, კრომველ როუდი და კინგსტონ აფონ ტემზი.

კანონისთვის შეუსაბამო NO2-ის დონე აგრეთვე დაფიქსირდა ილინგში, კამდენში, ლონდონის სითიში, ბრენტში, კენსიგტონის სამეფო რაიონში, შელსიში, ჰამერსმიტსა და ფულემში, სატონში, ფორესტსა და ვესტმინსტერში.

კამპანია „სუფთა ქალაქების“ ხელმძღვანელმა ოლივერ ლორდმა განაცხადა: „თუ ყოველივე ეს საგანგაშო არ არის, მაშინ არ ვიცი, რა შეიძლება ჩავთვალოთ საგანგაშოდ. შეზღუდვებით დაწესებული ჰაერის დაბინძურების დონე ჯერ კიდევ 12 წლის წინ უნდა შემცირებულიყო, მაგრამ როდესაც ეს დაბინძურების დონე ბოლოს და ბოლოს შემცირდება, ის მაინც ჯანმოს ნორმებზე ოთხჯერ უფრო მაღალი იქნება. უფრო მტკიცე საბუთები გვჭირდება იმისა, რომ ლონდონი ტოქსიკურ დიზელზე უარის თქმის გზაზეა. დაბალი გამონაბოლქვის ზონა დაუყოვნებლივ უნდა გაიზარდოს, ხოლო მერის გეგმა ლონდონის ცენტრში ნულოვანი გამონაბოლქვის ზონის შექმნის თაობზე უნდა დაჩქარდეს“.

ბრიტანეთში კანონით დაწესებულია NO2-ის წლიური მაქსიმუმი – 40 გ. კვადრატულ მეტრზე. ჯანმომ ახლახან შეცვალა მოთხოვნები NO2-ის წლიური მაქსიმუმის შესახებ 10 გრამამდე, ადამიანების ჯანმრთელობის მდგომარეობის უახლეს ანალიზზე დაყრდნობით.

ილინგში მცხოვრები დედა როზა ეპლბი ელისი კომენტარს აკეთებს: „ეს შოკისმომგვრელია. ჰაერის დაბინძურების გამო ჩემი ვაჟი საავადმყოფოში უკვე 12-ჯერ მოხვდა, ამას თან ერთვის სასწრაფო დახმარების 10 გამოძახება. ჩემს შვილს სუნთქვის უკმარისობის გამო ჰოსპიტალიზაცია დასჭირდა წლის დასაწყისში, როდესაც ჰაერის დაბინძურების ძალზედ მაღალი დონე დაფიქსირდა. იმ დღეებში იქ ბევრი სხვა მსგავსი სიმპტომის მქონე ბავშვიც იყო და საავადმყოფი ძლივს ახერხებდა პაციენტების მოვლას. ეს ბავშვები უკეთესს იმსახურებენ და ჩვენ  მეტი ყურადღება უნდა დავუთმოთ ჰაერის დაბინძურების პრობლემას“.

სტატიაზე მუშაობდა : ლილიან მეტრეველი და ანა კვეკვესქირი

წყარო : airqualitynews.com