200 მილიონი ფუნტი დაფინანსება დიდი ბრიტანეთის ავტობუსის ნულოვანი გამონაბოლქვის დაპირებისთვის

• დიდ ბრიტანეთის მთავრობამ გამოყო 200 მილიონი ფუნტის ინვესტიცია კიდევ 1000 ნულოვანი გამონაბოლქვის მქონე ავტობუსისთვის;
• მმართველობის პერიოდში მთავრობამ აიღო ვალდებულება, დააფინანსოს 4000 ნულოვანი გამონაბოლქვის მქონე ავტობუსი მთელი ქვეყნის მასშტაბით;
• გეგმის თანახმად, ქვეყნის ჰაერიდან წელიწადში 57000 ტონაზე მეტი ნახშირორჟანგის და საშუალოდ 22 ტონა აზოტის ოქსიდის ამოღება იგეგმება.

მთავრობის 200 მილიონი ფუნტი ინვესტიციის წყალობით, მთელი ქვეყნის მასშტაბით, დამატებით დაახლოებით 1000  ნულოვანი გამონაბოლქვის მქონე ავტობუსი დაფინანსდება.

ინგლისის თორმეტი მხარე, გრეითერ მანჩესტერიდან პორტსმუთამდე, საკუთარი რეგიონისათვის მიიღებს გრანტებს დაფინანსების პაკეტიდან როგორც ელექტრო ან წყალბადით მომუშავე ავტობუსების მისაღებად, ასევე დასამუხტი თუ საწვავის ინფრასტრუქტურისათვის.

გეგმის მიხედვით, ქვეყნის ჰაერიდან წელიწადში 57000 ტონაზე მეტი ნახშირორჟანგის და საშუალოდ 22 ტონა აზოტის ოქსიდის მოშორება იგეგმება.

დაფინანსება მოდის Zero Emission Buses Regional Area (ZEBRA) პროექტიდან, რომელიც გასულ წელს ამოქმედდა, რათა ადგილობრივ სატრანსპორტო განყოფილებებს ნულოვანი ემისიის მქონე ავტობუსების შეძენის შესაძლებლობა მიეცეთ.

ინგლისში, არსებული მთავრობის მმართველობის პერიოდში, ეს ნულოვანი გამონაბოლქვის მქონე, დაფინანსებული ავტობუსების საერთო რიცხვს 2000-მდე გაზრდის.

მთავრობამ აიღო ვალდებულება, მთელი ქვეყნის მასშტაბით დააფინანსოს 4000 ნულოვანი გამონაბოლქვის მქონე ავტობუსი.

ტრანსპორტის მდივანმა გრანტ შაპსმა თქვა: „მე პასუხისმგებლობას ავიღებ და გავასუფთავებ ჩვენს სატრანსპორტო ქსელს. ამიტომაც, მე გამოვყავი ასობით მილიონი ფუნტი, რათა მთელი ქვეყნის მასშტაბით ნულოვანი ემისიის მქონე ავტობუსები დავნერგოთ.

ეს არა მხოლოდ მგზავრთა გამოცდილებას გააუმჯობესებს, არამედ ხელს შეუწყობს ჩვენს მისიას, დავაფინანსოთ 4000 ასეთი სუფთა ავტობუსი, 2050 წლისთვის მივაღწიოთ წმინდა ნულოვანი გამონაბოლქვს და ავაშენოთ უფრო მწვანე გარემო.

დღევანდელი განცხადება არის ნაწილი ჩვენი „ეროვნული ავტობუსების სტრატეგიისა“, რომელიც შემოგთავაზებთ უფრო დაბალ ტარიფებს, რაც კიდევ უფრო შეამცირებს მგზავრებისათვის საზოგადოებრივი ტრანსპორტის ღირებულებას“.

ესენია ის რეგიონები, რომელთა ბიზნეს საქმეებიც დამტკიცდა და დაფინანსებას მიიღებს: ნორფოლკი, ჩრდილოეთ იორკშირი, პორტსმუთი, ბლექპული, ნოტინგჰემი, გრეითერ მანჩესტერი, ჰერტფორდშირი, სამხრეთ იორკშირი, ოქსფორდშირი, დასავლეთ მიდლენდი, იორკი და დასავლეთ იორკშირი.

ტრანსპორტის მინისტრმა ბარონესა ვერემ კომენტარი გააკეთა: „ჩვენ ვაცნობიერებთ იმ გამოწვევის მასშტაბებს, რომლის წინაშეც მსოფლიო დგას წმინდა ნულოვანი გამონაბოლქვის მიღწევის პროცესში. ამიტომაც, ემისიების შემცირება და მწვანე სამუშაო ადგილების შექმნა ჩვენი სატრანსპორტო დღის წესრიგის ცენტრშია.

დღევანდელი მრავალ მილიონ ფუნტიანი ინვესტიცია არის უზარმაზარი ნაბიჯი უფრო სუფთა მომავლისაკენ, რომელიც შემდეგი თაობებისათვის ტრანსპორტის შესაბამისობას უზრუნველყოფს და მილიონობით ადამიანს საშუალებას მისცემს, გადაადგილდეს ჩვენი გარემოსათვის უფრო სასიკეთო გზით“.

სტატიაზე მუშაობდა : თეონა ქავთარაძე და მეგი რუსია

წყარო : airqualitynews.com