სოფელ ჯიღაურას ცემენტის ქარხნის დემონტაჟი – ადგილობრივი მოსახლეობის გამარჯვება
მცხეთის რაიონ სოფელ ჯიღაურაში მოძრაობა „ჩემი ქალაქი მკლავს“ ადგილობრივ მოსახლეობასთან ერთად, დაახლოებით 1 თვეა,უკანონო ქარხნის წინააღმდეგ იბრძვის. ჩვენი მოძრაობის პროცესში ჩართვამდე, ადგილობრივი მოსახლეობა და საინიციატივო ჯგუფი ქარხნის წინააღმდეგ დაახლოებით 1 წელი იბრძოდა. აღსანიშნავია, რომ საწარმოს გამონაბოლქვი 5-ჯერ აღემატება დასაშვებ ნორმას და იგი დასახლებული პუნქტიდან სულ რაღაც 83 მეტრში მდებარეობს. ამავდროულად, ქარხნის ფუნქციონირებით ზიანდებოდა უნიკალური ქართული ჯიშები, რომლებიც მიმდებარე ტერიტორიაზეა გაშენებული.
ჩვენი მოძრაობის ორგანიზებით, გაიმართა რამდენიმე საპროტესტო აქცია, მათ შორის საქართველოს გარემოს დაცვისა და სოფლის მეურნეობის სამინისტროსა და მცხეთის მერიასთან,სადაც ადგილზევე კომუნიკაცია გვქონდა სხვადასხვა ჟურნალისტთან ინფორმაციის გაშუქებისა და გავრცელების მიზნით.
ქარხნის წინააღმდეგ ბრძოლის ერთ-ერთი მიმართულება სამართლებრივი დავაც იყო. 2023 წლის აპრილში ადგილობრივი მოსახლეობის სახელით პირველი სარჩელი შევიდა სასამართლოში აღნიშნული ცემენტის ქარხნის ფუნქციონირებასთან დაკავშირებული დარღვევების გასაჩივრების მიზნით.
საბოლოოდ, ამ ყველაფერმა გამოიღო შედეგი და ქარხანა დღესდღეობით გაჩერებულია, მიმდინარეობს მისი დემონტაჟი. შედეგად კი ადგილობრივ მოსახლეობას ისევ ექნება წვდომა ჯანმრთელობისთვის უსაფრთხო, სუფთა ჰაერზე.
სტატიაზე მუშაობდა : ნინი თოიძე