ქალაქში მოწყობილ მწვანე სივრცეებს ჰაერის დაბინძურების 50 პროცენტით შემცირება შეუძლია

• ბრიტანეთში დასრულდა მასშტაბური კვლევა გამწვანების ურბანულ სივრცეებზე პოზიტიური გავლენის შესწავლისთვის.

• კვლევამ ცხადყო, რომ მწვანე ზონები – ხეები და პარკები – აუმჯობესებს არა მხოლოდ ჰაერის ხარისხს, არამედ ადამიანების ფიზიკურ და მენტალურ ჯანმრთელობასაც.

• ინგლისში ჩატარებულმა კვლევებმა უკვე დაადასტურა, რომ საავტომობილო გზების გასწვრივ ხეების დარგვა გამონაბოლქვს ამცირებს, თუმცა გასათვალისწინებელია მცენარეების ზომა და სახეობა.

ბრიტანეთის გარემოს დაცვის კომიტეტმა დაასრულა კვლევა, რომელიც აღწერს, თუ რა გავლენას ახდენს გამწვანება ურბანული დასახლებების ეკოლოგიურ მდგომარეობაზე. ორგანიზაციის „Public Health England-ის“ შეფასებით, ყოველწლიურად ჯანდაცვის სახელმწიფო სერვისებზე 2,1 მილიონი გირვანქა სტერლინგის დაზოგვა იქნებოდა შესაძლებელი ქალაქის ყველა მაცხოვრებლისთვის პარკსა თუ სკვერში სპორტული აქტივობა ხელმისაწვდომი რომ ყოფილიყო. შესაბამისად, კომიტეტმა მიზნად დაისახა, შეესწავლა ბრიტანეთის მასშტაბით ქალაქებში არსებული პარკებისა და მწვანე ზონების კეთილმოწყობის დონე და ის, თუ როგორია სხვადასხვა სოციალური ჯგუფის წარმომადგენლებისთვის მწვანე სივრცეში დასვენების შესაძლებლობა.

კომიტეტმა აგრეთვე განიხილა ქალაქების გამწვანების პოზიტიური ზეგავლენა ჰაერის ხარისხზე, მოსახლეობის ჯანმრთელობასა და ჯანსაღი ცხოვრების წესის დანერგვაზე.

ერთ-ერთი მომხსენებელი პროფესორი პრაშანტ კუმარი იყო, რომელიც სარის უნივერსიტეტში მდგრადი განვითარების მიმართულებით მუშაობს. იგი ქსელ RECLAIM Network-ის მთავარი მკვლევარია, რომლის მიზანიცაა მოსახლეობისთვის მწვანე ინფრასტრუქტურის შესახებ ინფორმაციაზე ხელმისაწვდომობის გაზრდა. კუმარის თქმით, მნიშვნელოვანია არა მხოლოდ ქალაქებში დარგული ხეების რაოდენობა, არამედ მათი ადგილმდებარეობაც. „თუ მთელ ლონდონში დავრგავთ ხეებს, ჰაერის ხარისხი მხოლოდ უმნიშვნელოდ გაუმჯობესდება. აუცილებელია ხეების სტრატეგიულ ადგილებში დარგვა, რათა შემცირდეს ატმოსფეროში აზოტის დიოქსიდის გამოყოფა“, – განაცხადა კუმარმა.

მდგრადი განვითარების ცენტრში ჩატარებულმა კვლევებმა უკვე დაადასტურა, რომ საავტომობილო გზების გასწვრივ ხეების დარგვა გამონაბოლქვს ამცირებს, თუმცა გასათვალისწინებელია მცენარეების ზომა და სახეობა.

პროფესორმა კუმარმა გამწვანების სხვა მნიშვნელოვან პოზიტიურ ეფექტებზეც ისაუბრა, როგორებიცაა: წყალდიდობებისგან მიყენებული ზარალის შემცირება, მენტალური ჯანმრთელობის გაუმჯობესება და ქალაქებში ტემპერატურის შემცირება. მან მოახსენა საბჭოს წევრებს, რომ გასული ზაფხულის ყველაზე ცხელ დღეებში გილდფორდის ტყიან რეგიონებში ტემპერატურა ლონდონის ცენტრთან შედარებით 13 გრადუსით უფრო დაბალი იყო.

ლონდონის ველური ბუნების შემსწავლელი კომიტეტის დირექტორმა, მეთიუ ფრიტმა, დამატებით აღნიშნა, რომ გამწვანება მნიშვნელოვნად დაეხმარება ბრიტანელებს კლიმატის ცვლილებებთან ბრძოლაში, შეუწყობს ხელს ბიომრავალფეროვნების შენარჩუნებას, ხოლო არსებული მწვანე ზონების კომერციალიზაციას შეიძლება ცუდი შედეგები მოჰყვეს.

კომიტეტის წევრებმა აღნიშნეს, რომ მწვანე სექტორში კვალიფიციური კადრების ნაკლებობაა, რასაც მთავრობამ ყურადღება უნდა მიაქციოს. ასევე, საჭიროა მოსახლეობასთან მუშაობაც და ხალხის ინფორმირება იმის თაობაზე, თუ რისი გაკეთება შეუძლიათ უბრალო მოქალაქეებს, რათა დაეხმარონ უბანს, რომელშიც ცხოვრობენ. პროფესორმა კუმარმა აგრეთვე აღნიშნა, რომ მეცნიერებმა და პოლიტიკოსებმა აუცილებლად უნდა ითანამშრომლონ. „ფართო საზოგადოებასა და პოლიტიკოსებთან ურთიერთობა ჩვენი ყოველდღიური საქმის ნაწილია. სასიამოვნო იყო პარლამენტის წევრებთან საუბარი და იმის დანახვა, რომ მათ ესმით აკადემიური კვლევების მნიშვნელობა“, – განაცხადა პროფესორმა.

სტატიაზე მუშაობდა: ლილიან მეტრეველი, ნინი თოიძე

წყარო: Airqualitynews.com

29 მაისი 2024 წელი