მწვანე პოლუსი აჩერებს მუშაობას რუსული კანონის გამო

2 თვის განმავლობაში მწვანე პოლუსი წყვეტს ყველანაირი ტიპის აქტივობას. ორგანიზაციის მომავალი და განვითარების გეზი დამოკიდებულია მიმდინარე წლის 26 ოქტომბრის საპარლამენტო არჩევნებზე. თუ არჩევნების შემდეგ „აგენტების კანონი“ არ გაიწვიეს, სათუო იქნება ორგანიზაციული საქმიანობის გაგრძელების შესაძლებლობა, უარეს შემთხვევაში კი – ნებისმიერი სხვა ფორმით ფუნქციონირება.

დღევანდელი მოცემულობით, რადგან კანონი ჯერ კიდევ ძალაშია, დაჯარიმების ფინანსური რესურსი ორგანიზაციას არ გააჩნია და ამავდროულად ჯარიმა გამოიწვევს სამომავლოდ „მწვანე პოლუსის“ რიგი ქმედების შეზღუდვას, მივიღეთ ღირსების შემლახავ რეესტრში რეგისტრაციის გადაწყვეტილება. აღსანიშნავია შემდეგი გარემოებაც – მწვანე პოლუსი წარმოადგენს ერთ-ერთ მოსარჩელე ორგანიზაციას საქართველოს საკონსტიტუციო სასამართლოში 121 სხვა ორგანიზაციასთან ერთად (ორგანიზაციების სრული სია მითითებული ლინკის მიმაგრებულ ფაილში არის ხელმისაწვდომი). ჩვენი მიზანია, საერთო ბრძოლაში ჩვენი წვლილის შეტანა და ისე მოქმედება, რომ პროცესი არ დაზიანდეს. როგორც იურისტებმა ერთ-ერთი საკოორდინაციო შეხვედრის ფარგლებში განგვიმარტეს, არარეგისტრირებულობა არ წარმოადგენს მოსარჩელეობის პირობას, რადგან ეს გადაწყვეტილება იძულებით ნაბიჯს წარმოადგენს და თვალსაჩინოს ხდის ორგანიზაციებისთვის მიყენებულ ზიანს.

მიმდინარე პერიოდში ვაგრძელებთ მოსარჩელე ორგანიზაციებთან ერთად მუშაობას საკონსტიტუციო სასამართლოში ჩვენი სიმართლის დასამტკიცებლად.

2 სექტემბერი 2024 წელი