მსოფლიოში პირველი ჰიპერლოკალური ჰაერის ხარისხის მონიტორინგის ქსელი ფართო საზოგადოებისთვის ხელმისაწვდომი გახდა

• კამდენის რაიონის (ლონდონი) ქუჩებში დამონტაჟდა ჰაერის ხარისხის მაკონტროლებელი სენსორები და შეიქმნა ქსელი, რომლის მონაცემებიც ხელმისაწვდომია ვებ-პლატფორმაზე
• კომპანია „Airscape”-ის სამომავლო მიზანია, მსგავსი ქსელები შეიქმნას მსოფლიოს ყველა დიდ ქალაქში
• პლატფორმის ბეტა-ვერსიის პირველადმა ტესტირებამ აჩვენა, რომ მას შეუძლია ქუჩების მიკრო დონეზე ყოველდღიური „ინციდენტების“ იდენტიფიკაცია

  კამდენის რაიონში 225-ზე მეტი სენსორი დამონტაჟდა, რომელიც რეალურ დროში ინფორმაციას აწვდის ფართო საზოგადოებას ყოველ ქუჩაზე ჰერის ხარისხის შესახებ.

„Camden Council“-თან და „The Camden Clean Air Initiative“-თან თანამშრომლობის შედეგად, „AirScape“-მა სტაციონარული სენსორების ქსელი შექმნა, რომელიც მოიცავს 45-ჯერ უფრო მეტ მონაცემების შეგროვების წერტილს და 60-ჯერ უფრო რეგულარულად განახლებადია, ვიდრე აქამდე არსებული ჰაერის ხარისხის კონტროლის სადგურები.

მონაცემები ხელმისაწვდომია ვებ-პლატფორმა „AirScape“-ზე, რაც საშუალებას აძლევს კერძო პირებს, საწარმოებსა და ადგილობრივი თვითმმართველობის ორგანოებს, მიიღონ არგუმენტირებული გადაწყვეტილებები ჰაერის ხარისხის გაუმჯობესების თაობაზე.

„AirScape“ ისწრაფვის, გაიმეოროს მსგავსი მიდგომა მთელ ლონდონსა და მსოფლიოს ყველა დიდ ქალაქში.

დოქტორმა მეტიუ ჯონსონმა, „AirScape“-ის მთავარმა სამეცნიერო ხელმძღვანელმა, განაცხადა: „ჰერის დაბინძურება ერთ-ერთი ყველაზე სერიოზული პრობლემაა, რომლის წინაშეც ახლა კაცობრიობა დგას. ამ კრიზისის გადასალახად პოლიტიკოსებს, საწარმოებსა და ფართო საზოგადოებას სჭირდებათ ინფორმაცია ჰაერის ხარისხზე, რეალური დროის რეჟიმში, საჯაროდ ხელმისაწვდომი, ზუსტი მონაცემების საფუძველზე.

ამ პროექტის წყალობით „AirScape“-ი უხილავს ხილულად აქცევს. კამდენში ჩვენი სენსორების ქსელი უზრუნველყოფს ჰაერის დაბინძურების შესახებ დეტალური ინფორმაციის მიწოდებას მაღალი ხარისხის რეჟიმში. ეს ქსელი დაეხმარება პოლიტიკოსებს მოსახლეობის ჯანმრთელობისა და კეთილდღეობის უზრუნველყოფისათვის აუცილებელი გადაწყვეტილებების მიღებაში, ხოლო მოსახლეობას საშუალებას მისცემს, ყოველდღიურად გადამოწმებულ ინფორმაციაზე დაფუძნებული გადაწყვეტილებები მიიღოს, რათა დაბინძურებულ ჰაერს აარიდოს თავი.

კამდენი პირველი მნიშვნელოვანი ადგილია, სადაც „AirScape“-ის ქსელს იყენებენ და ჩვენი ამბიციური მიზანია, ეს ქსელი მსოფლიოს ყველა დიდ ქალაქში დავამონტაჟოთ, რაც უზარმაზარი ნახტომი იქნება ჰაერის დაბინძურებასთან ბრძოლაში“.

პლატფორმის ბეტა-ვერსიის პირველადმა ტესტირებამ გასული თვის განმავლობაში უკვე აჩვენა, რომ მას შეუძლია ყოველდღიური „ინციდენტების“ იდენტიფიკაცია, რომლებიც ქუჩების მიკრო დონეზე ხდება. სისტემა ასევე ავლენს ექსტრემალურ დაბინძურებას საათობრივად, როგორიცაა NO2 -ის მაღალი დონის დაფიქსირება პიკის საათებში.

მაგალითად, 1-ელ მარტს ლონდონში მომხდარი მეტროს თანამშრომლების გაფიცვების შედეგად, პიკის საათებში ჰაერში NO2-ის განსაკუთრებით მაღალი დონე დაფიქსირდა, რადგან მოსახლეობა საავტომობილო ტრანსპორტით სარგებლობდა. ხოლო წლის ყველაზე ცხელ დღეს, 17 ივნისს, ლონდონის ჰაერში ოზონის არაჯანსაღი დონე დაფიქსირდა.

კლერ ადამ ჰარისონმა, კამდენის მდგრადი განვითარების მინისტრთა კაბინეტის წევრმა, განაცხადა: „ჰაერის დაბინძურების დონის შემცირება აუცილებელია კამდენის თითოეული მაცხოვრებლის ჯანმრთელობისა და კეთილდღეობისათვის. ამ ქსელის დეტალური მონაცემები რევოლუციას მოხდენს ჩვენს თანამშრომლობაში მოსახლეობასთან და მოგვცემს შესაძლებლობას, მივიღოთ უფრო გონივრული გადაწყვეტილებები ჰაერის დაბინძურებასთან ბრძოლაში.

მადლობას ვუხდი „AirScape“-ს, „Camden Clean Air Initiative“-ს და კამდენის ჰაერის ხარისხის ექსპერტებისა და ქუჩების განათების გუნდებს მათი უნაკლო მუშაობისათვის ამ ქსელის მოსაწყობად. ამ მონაცემების თავისუფალი წვდომის უზრუნველყოფა ჩვენი საზოგადოების წევრებისათვის კიდევ ერთხელ მოწმობს ჩვენი საბჭოს ძველი პრინციპებისადმი ერთგულებას, რომელიც საზოგადოების ინტერესების შესაბამისად მონაცემთა საჯარო გავრცელებას გულისხმობს“.

სტატიაზე მუშაობდა : ლილიან მეტრეველი და მეგი რუსია

წყარო : airqualitynews.com