მანგროს ტყეები საფრთხეშია
მანგროს ტყეები ტროპიკულ და სუბტროპიკულ სანაპირო ზოლებზე გვხვდება, ზღვასა და ხმელეთს შორის. ასეთი ტყეები დედამიწის ყველაზე ადაპტირებადი ეკოსისტემების რიცხვში შედიან – ეგუებიან ტროპიკულ სიცხეს, მარილიან წყალს, წყლის დონის მკვეთრ ცვალებადობას.
მანგროს ტყეების ხეებს მეტად დამახასიათებელი, ძლიერ დატოტვილი ფესვები აქვთ. ასეთი ფესვები ხეებს რბილ, ლამიან ზედაპირზე დამაგრების საშუალებას აძლევენ. მათ ფესვებში მრავალი სახეობის ცხოველი პოულობს თავშესაფარსა და საკვებს. ამ ტყეების საშუალებით ხდება წყლის გაფილტრვა, მცირდება ტალღები და იკლებს წყალდიდობების რაოდენობა. ისინი ამაგრებენ სანაპირო ზოლს. 100 მეტრის სიგანის მქონე მანგროს სარტყელს შეუძლია ტალღების სიმაღლე ორი მესამედით შეამციროს. მანგროს ტყის აღდგენა ხუთჯერ უფრო ეფექტურია, ვიდრე ხელოვნურად აგებული ჯებირები.
სამწუხაროდ 1980-იანი წლებიდან მოყოლებული მანგროს ტყეების მესამედზე მეტი განადგურდა, რაც საფრთხეს უქმნის ადგილობრივ ეკოსისტემას. მანგროს ხეებს ჩეხავენ და იყენებენ მშენებლობისთვის, შეშისთვის. გათავისუფლებულ ადგილებზე შენდება ბრინჯის, სოიოს და პალმის პლანტაციები, ეწყობა ტურისტული ინფრასტრუქტურა. მანგროს ტყეების შენარჩუნება მნიშვნელოვანია მთლიანი ეკოსისტემისთვის.
სტატიაზე მუშაობდა : მეგი წერეთელი და ანა კუხაშვილი