მადაგასკარში შექმნილი ვითარება კლიმატური კრიზისის საგანგაშო გამოვლინებაა

• წინა წელს კლიმატური ცვლილებების გამო 38 მილიონ ადამიანს მოუწია თავისი საცხოვრებელი ადგილის დატოვება. ამავე ტემპით 2050 წლისთვის ეს მაჩვენებელი 216 მილიონ ადამიანს მიაღწევს.
• წლის ბოლომდე მადაგასკარის 30,000 მოსახლეს შიმშილობა მოუწევს, 1.1 მილიონი ადამიანი კი საკვების სერიოზულ დანაკლისს განიცდის – გაერო.
• მადაგასკარში ადამიანებმა კაქტუსის ღეროების ჭამა დაიწყეს, რაც, ჩვეულებრივ, ფერმის ცხოველების გამოსაკვებად გამოიყენება.

გაეროს მსოფლიო სასურსათო პროგრამის დირექტორმა, დევიდ ბიზლიმ, განაცხადა, რომ ის, რაც ინდოეთის ოკეანის დასავლეთით მდებარე მადაგასკარის კუნძულზე ხდება, არის თვალსაჩინო მაგალითი, თუ რას უნდა ველოდოთ მთელი მსოფლიოს მასშტაბით კლიმატური კრიზისის უგულებელყოფის შემთხვევაში.

წინა წელს კლიმატური ცვლილებების გამო 38 მილიონ ადამიანს მოუწია თავისი საცხოვრებელი ადგილის დატოვება. ამავე ტემპით 2050 წლისთვის ეს მაჩვენებელი 216 მილიონ ადამიანს მიაღწევს.

სწორედ 2050 წლისთვის ბევრი ინდუსტრიალიზებული სახელმწიფო, ჩინეთის, რუსეთისა და ინდოეთის გამოკლებით, აპირებს ნახშირბად ნეიტრალურობის მიღწევას, რაც ნიშნავს, რომ სათბურის აირების გამოყოფა იმ დონემდე შემცირდება, რომ გარემოში ამ აირების თითქმის სრულად შეწოვა შესაძლებელი იქნება.

2017 წელს, როდესაც სამხრეთ კაროლინას ყოფილი გუბერნატორი ბიზლი მსოფლიო სასურსათო პროგრამის დირექტორი გახდა, კაცობრიობის მთავარი საფრთხე ადამიანებს შორის კონფლიქტი და შეიარაღებული დაპირისპირება იყო, მეორე ადგილს კი კლიმატური ცვლილებები იკავებდა. მას შემდეგ კლიმატური ცვლილებების უარყოფითი გავლენა, განსაკუთრებით კი მოწყვლად ჯგუფებზე, ყოველდღიურად იზრდება.

გაეროს განახლებული მონაცემებით, წლის ბოლომდე მადაგასკარის 30,000 მოსახლეს შიმშილობა მოუწევს, 1.1 მილიონი ადამიანი კი საკვების სერიოზულ დანაკლისს განიცდის. მდგომარეობას უჩვეულოდ მაღალი ტემპერატურა, გვალვა და ქვიშის ქარიშხლები ამძიმებს.

სამწუხაროდ, მადაგასკარში ადამიანებმა კაქტუსის ღეროების ჭამა დაიწყეს, რაც, ჩვეულებრივ, ფერმის ცხოველების გამოსაკვებად გამოიყენება.

ბიზლი ამახვილებს ყურადღებას იმ გარემოებაზე, რომ 27 მილიონი ადამიანით დასახლებულ კუნძულს ძალიან მცირე წვლილი მიუძღვის კლიმატური კრიზისის გაუარესების პროცესში, ვითარება კი მაინც ძალიან მძიმეა.

კონტრასტისთვის, ეთიოპიაში საკვების ნაკლებობა ომითა და დაპირისპირებით არის გამოწვეული. გაეროს მსოფლიო სასურსათო პროგრამის მონაცემებით, ომით დაზარალებულ ტიგრაის რეგიონში 5.2 ადამიანი არ იღებს საკმარის საკვებს. სამწუხაროდ, სწრაფი და ეფექტური ზომების მიღების გარეშე, 400,000 ადამიანს შიმშილით სიკვდილი ელის.

ბიზლი ამბობს, რომ მიმართა ეთიოპიის მთავრობას, რათა გაეროს პროგრამისთვის ტიგრაის რეგიონში საკვების შეტანის საშუალება მიეცა, თუმცა მთავრობა ყველანაირ გზას ზღუდავს, პირდაპირ ფინანსურ დახმარებასაც კი,  შესაბამისად მოსახლეობის წინაშე ან მიგრაციის, ან სიკვდილის არჩევანი დგას.

გასაკვირია, თუმცა ავღანეთში თალიბებმა გაეროს წარმომადგენლებს დართეს ნება, გაეწიათ დახმარება ყველაზე რთულ მდგომარეობაში მყოფი რეგიონების მოსახლეობისთვის, ძირითადი აქცენტი სკოლის მასწავლებლებზე გაკეთდა, რომლებიც ანაზღაურების გარეშე მუშაობენ.

უცხოელი დონორების გარეშე ავღანეთში სიტუაციის გაუარესება მოსალოდნელია იანვარში, როდესაც გაეროს საკვების მარაგები ამოწურვას დაიწყებს.

,,ამ ადამიანთა გამოკვება თვეში 230 მილიონი დოლარი ჯდება. 8.7 მილიონი ადამიანი კი ფაქტობრივად სრული შიმშილის მდგომარეობას უახლოვდება“, – განაცხადა ბიზლიმ.

შეგახსენებთ, რომ წინა წელს გაეროს ამ სააგენტომ ნობელის მშვიდობის პრემია მიიღო.

სტატიაზე მუშაობდა : ნინი თოიძე

წყარო : www.ctvnews.ca