ლესტერი ავტობუსების ოცდაათ გაჩერებას მწვანე საფარით გადახურავს და მათ ფუტკრების გაჩერებად გარდაქმნის
- დიდი ბრიტანეთის ქალაქ ლესტერში ფუტკრების გაჩერებების ახალი ქსელის მოწყობის პროცესი მიმდინარეობს.
- „ძალიან სასიამოვნოა, რომ გამწვანებულსახურავიანი ავტობუსის გაჩერებები მთელი ქალაქის მასშტაბით გამოჩნდება“.
- ,,მზის ენერგიისა და გამწვანებული სახურავების კომბინაცია კიდევ ერთი წინ გადადგმული ნაბიჯია ჩვენი ამბიციის მისაღწევად”.
დიდი ბრიტანეთის ქალაქ ლესტერში ფუტკრების გაჩერებების ახალი ქსელის მოწყობის პროცესი მიმდინარეობს. ქსელი მოიცავს ავტობუსის ოცდაათ ე.წ. ცოცხალსახურავიან გაჩერებას, რომლებზეც განთავსებული იქნება ველური ყვავილები და კლდისდუმას ჯიშის მცენარეები, რომლებიც განსაკუთრებით იზიდავენ დამამტვერიანებელ მწერებს, რომელთა რაოდენობა ბოლო პერიოდში მნიშვნელოვნად შემცირდა.
ფუტკრის პოპულაციის შემცირების წინააღმდეგ ბრძოლაში ქალაქ ლესტერმა „clear channel“-თან თანამშრობლობით ავტობუსების გაჩერებები ფუტკრების ნამდვილ სავანედ აქცია. ეს მწვანე ზონები, უფრო სწორად, ფუტკრების გაჩერებები, ძირითადად ავტობუსის მოსაცდელებია, რომელთა სახურავებზე იზრდება ბალახი და ველური ყვავილები იმ მიზნით, რომ შეიქმნას დამტვერვისთვის საჭირო გარემო პირობები. ეს თავშესაფრები ხელს შეუწყობს ბიომრავალფეროვნების დაცვასა და კლიმატის მედეგობას, შეიწოვს წვიმის წყალს, ხელს შეუწყობს ურბანული სითბოს ეფექტისა და ასევე ჰაერში არსებული ნაწილაკების რაოდენობის შემცირებას.
„ძალიან სასიამოვნოა, რომ გამწვანებულსახურავიანი ავტობუსის გაჩერებები მთელი ქალაქის მასშტაბით გამოჩნდება“, – განაცხადა ლესტერის მერის მოადგილემ, ადამ კლარკმა, რომელიც ხელმძღვანელობს გარემოს დაცვისა და ტრანსპორტის დეპარტამენტს. ,,ჩვენს წამოწყებას ძალიან ბევრი ადამიანი დადებითად გამოეხმაურა, რადგან ისინიც ისევე არიან აღფრთოვანებული, როგორც ჩვენ, როდესაც ვხედავთ, როგორ გარდაიქმნება ავტობუსების გაჩერებები ფუტკრებისა და პეპლების თავშესაფრად“. ახალი, თანამედროვე გაჩერებები ასევე მოსახერხებელი იქნება მგზავრებისთვისაც. ,,მზის ენერგიისა და გამწვანებული სახურავების კომბინაცია კიდევ ერთი წინ გადადგმული ნაბიჯია ჩვენი ამბიციის მისაღწევად, რომ 2030 წლისთვის ვიყოთ ნახშირბადნეიტრალური და კლიმატის პირობებს მორგებული ქალაქი“.
როგორც კი შესაძლებელი გახდება, ავტობუსების ყველა სხვა გაჩერებაც აღიჭურვება მზის პანელებით, რომელთა მიერ გამომუშავებული ენერგია მოხმარდება ჭკვიან განათებას, რაც, თავის მხრივ, ხელს შეუწყობს ენერგიის გამოყენების უკეთეს კონტროლს. გამწვანებული სახურავები 10-წლიანი კონტრაქტის ნაწილია ლესტერის საკრებულოსა და ბრიტანულ „clear channel“-ს შორის.
ამ ტიპის ფუტკრების გაჩერებები უკვე დამონტაჟებულია უტრეხტში, ნიდერლანდებში.
სტატიაზე მუშაობდა : მაია ბურდული და ნინი თოიძე
წყარო : www.designboom.com