ჰავაი ხდება აშშ-ს პირველი შტატი, რომელიც აცხადებს კლიმატის საგანგებო მდგომარეობას
ჰავაი გახდება აშშ-ის პირველი შტატი, რომელიც გამოაცხადებს კლიმატის საგანგებო მდგომარეობას მას შემდეგ, რაც საკანონმდებლო ორგანო დაამტკიცებს შტატის სენატის 44-ე რეზოლუციას.
კანონპროექტი „აღიარებს, რომ კლიმატის საგანგებო მდგომარეობა საფრთხეს უქმნის კაცობრიობასა და ბუნებრივ სამყაროს, შესაბამისად აცხადებს კლიმატის საგანგებო სიტუაციას და მოითხოვს თანამშრომლობას ქვეყნის მასშტაბით, რათა დაუყოვნებლივ ამოქმედდეს სათანადო გარდამავალი პროცესები და სახელმწიფო უსაფრთხო კლიმატური გარემოს აღდგენის მიზნით მობილიზდეს”.
ეს კანონპროექტი მოუწოდებს შტატის სახელმწიფო აპარატს ვალდებულება აიღოს „ნაკლები გამონაბოლქვისა და ნარჩენების ეკონომიკაზე დროულ გადასვლაზე, რომელიც ხელს უწყობს ინვესტიციების მოზიდვას, უზრუნველყოფს სუფთა ენერგიის გამომუშავებას, ხარისხიანი სამუშაო ადგილების შექმნასა და კლიმატის კრიზისთან ბრძოლის მიზნით ქვეყნის მასშტაბით მზადყოფნასა და მობილიზაციას”.
კანონპროექტს მხარს უჭერს ჰავაის კლიმატისა და გარემოს დაცვის კოალიციის, 350 ჰავაის, წევრი, რომელმაც Facebook-ის საკუთარ გვერდზე წერს: “ჩვენ ვართ ის, ვისი იმედიც აქვს მომავალ თაობას”.
“ჰავაი პირველი შტატია, რომელიც შეუერთდა მოძრაობას, რომელსაც ძირითადად ქალაქები და ქვეყნის ადმინისტრაციული ერთეულები უწევდნენ ორგანიზებას კლიმატის საგანგებო მდგომარეობის გამოცხადების მიზნით. იგი ასახავს ჩვენი სახელმწიფოს საკანონმდებლო ორგანოს ვალდებულებას, რომ განაგრძოს კლიმატის ცვლილების მიზეზებისა და ზემოქმედების გამოსწორება”, – განაცხადა შტატის წარმომადგენელმა ლიზა მარტენმა (D-51), რომელიც ხელმძღვანელობდა ღონისძიების პალატის ვერსიას.
კლიმატური პრობლემებთან ბრძოლის მოძრაობის მობილიზაციის პროექტის თანახმად, მსგავსი განცხადებები გაკეთდა მსოფლიოს 1,900 საკანონმდებლო ორგანოს მიერ, მათ შორის 144 ორგანო აშშ-ის 24 შტატში. კლიმატის საგანგებო დეკლარაციებს ადრე აკეთებდნენ ჰავაის და მაუის ადმინისტარციული საბჭოები.
ფედერალურ დონეზე პრეზიდენტ ჯო ბაიდენს ასევე მოუწოდებენ კლიმატის საგანგებო მდგომარეობის გამოცხადებისკენ.
თებერვალში წარმომადგენლები ერლ ბლუმენაუერი (D-Ore.) და ალექსანდრა ოკასიო-კორტესი (DN.Y.) შეუერთდნენ სენატორ ბერნი სანდერსს (I-Vt.) და წარადგინეს ეროვნული კლიმატის საგანგებო აქტი 2021, რომელიც ითვალისწინებს ინვესტიციების ჩადებას „ფართომასშტაბიანი კრიზისის შემაფერხებელ და მდგრად პროექტებში”. ინვესტიციები ასევე ხელს შეუწყობს „რასობრივი და სოციალური კუთხით სამართლიან გადასვლას სუფთა ენერგიის ეკონომიკაზე”.
„ჩვენი ქვეყანა კრიზისშია და ამის მოსაგვარებლად ჩვენ მოგვიწევს ჩვენი სოციალური და ეკონომიკური რესურსების სრული მობილიზება”, – განაცხადა ოკასიო-კორტესმა. „თუ გვინდა, რომ თავიდან ავიცილოთ წარსულის შეცდომების გამეორება, თუ გვსურს, დავრწმუნდეთ, რომ ჩვენს ქვეყანაში სამართლიანად აღდგება ეკონომიკა, რათა თავიდან ავიცილოთ კიდევ ერთი უმნიშვნელოვანესი კრიზისი, მაშინ უნდა დავარქვათ ამ სიტუაციას რეალური სახელი, რაც არის ეროვნული საგანგებო მდგომარეობა”.
სტატიაზე მუშაობდა : მაია ბურდული და ნინი თოიძე