ანჯელინა ჯოლი ფუტკრებით დაფარული ფოტოთი მათი დამტვერვის პროცესში ჩართულობის აუცილებლობას აღნიშნავს
20 მაისს მსოფლიო მასშტაბით ფუტკართა დღე აღინიშნება. სწორედ ამ დღისთვის ანჯელინა ჯოლი გამოცემა National Geographic-თან გაერთიანდა საერთო კამპანიისთვის.
მცენარეთა დამტვერვის პროცესში ფუტკართა ჩართულობის უდიდესი მნიშვნელობის შესახებ ცნობიერების ასამაღლებლად National Geographic-ის ჟურნალში ჯოლის ფუტკრებით დაფარული ფოტო ვრცელდება.
,,ჩვენ სამეცნიერო რანგზე უნდა გვესმოდეს, რა მოხდება იმ შემთხვევაში, თუ ეს მწერები გაქრებიან. ფუტკართა პოპულაციის შენარჩუნება ისეთი პრობლემაა, რომლის გადასაჭრელად ერთიანი ძალისხმევაა საჭირო“, – ამბობს ჯოლი გამოცემასთან საუბრისას.
მსახიობი დიდი ხნის განმავლობაში თანამშრომლობდა გაეროს ლტოლვილთა უმაღლეს კომისარიატთან, ახლა კი იგი იწყებს მუშაობას იუნესკოსთან ინიციატივისთვის ,,ქალები ფუტკრებისთვის“, რომლის ფარგლებშიც გაკეთდება 2,500 სკა ფუტკართა პოპულაციის 125 მილიონით გაზრდის პერსპექტივით 2025 წლისთვის.
National Geographic-ისთვის ფოტოს გადაღება არც ისე მარტივი აღმოჩნდა. მწერებთან სიფრთხილის ფაქტორს პანდემიაც დაემატა. გამომცემლობის ფოტოგრაფებმა პროცესის გასაადვილებლად იმ ტექნიკას მიმართეს, რომელიც ცნობილმა ამერიკელმა ფოტოგრაფმა, რიჩარდ ავედონმა, 40 წლის წინ გამოიყენა. ფუტკართა გადაღების პროცესში ,,სამართავად“ გამოიყენეს ფერომონი, ქიმიური ნივთიერება, რომელსაც ცოცხალი ორგანიზმები გამოყოფენ და რომელიც ახდენს გავლენას ამავე სახეობის წარმომადგენლების ქცევაზე.
ფოტოზე იტალიურ ფუტკრებს ვხედავთ. ანჯელინა ჯოლის გარდა, პროცესში ჩართულ ყველა პირს დამცავი აღჭურვილობა ეცვა. გარემოში სიჩუმე და სიბნელე უნდა შენარჩუნებულიყო ფუტკართა სიწყნარისთვის. ჯოლის სხეული დაიფარა ფერომონით იმ ადგილებში, სადაც ფუტკრებს თავი უნდა მოეყარათ. მსახიობი 18 წუთის განმავლობაში გაუნძრევლად იდგა. ფოტოგრაფი დენ უინტერსი ამბობს, რომ ეს ერთ-ერთი ყველაზე საოცარი ფოტოსესია იყო არა მხოლოდ მისთვის, არამედ მთლიანი გადამღები ჯგუფისთვის, რომელიც ამავდროულად ძალიან მნიშვნელოვანი საკითხის შესახებ ცნობიერების ამაღლებას ემსახურება.
სტატიაზე მუშაობდა : ნინი თოიძე
წყარო : www.ecowatch.com