ინგლისში სკოლების 86% ისეთ გარემოში შენდება, რომელიც WHO-ის სტანდარტებს ვერ აკმაყოფილებს

• ლონდონის სამეფო კოლეჯის მკვლევრებმა 2017-2025 წლებში 147 სკოლის ასაშენებლად შემოთავაზებულ ადგილებში ჰაერის ხარისხი გამოიკვლიეს
• სკოლების ასაშენებლად შემოთავაზებულ ყოველ ლოკაციაზე სულ მცირე ერთი დამაბინძურებლის კონცენტრაცია აჭარბებდა დასაშვებ ნორმას.
• კვლევითმა ჯგუფმა აღნიშნა, რომ სასკოლო განაცხადების რეკომენდაციებში არ შედის შემოთავაზებულ ადგილებში ჰაერის ხარისხის შემოწმების არცერთი მოთხოვნა.

ლონდონის სამეფო კოლეჯის მკვლევრებმა 2017-2025 წლებში 147 სკოლის ასაშენებლად შემოთავაზებულ ადგილებში ჰაერის ხარისხი გამოიკვლიეს. მათ აღრიცხეს თითოეული სკოლის ადგილზე PM2.5, PM10 და NO2-ის კონცენტრაციები და აღმოაჩინეს, რომ შემოთავაზებული ადგილების 86%-მა (147-დან 126-მა) ჩამოთვლილი დამაბინძურებლების WHO-ის სტანდარტები ვერ დააკმაყოფილა და ყოველ ლოკაციაზე სულ მცირე ერთი დამაბინძურებლის კონცენტრაცია აჭარბებდა დასაშვებ ნორმას.

მედიანური PM2.5-ის მაჩვენებელი ყველა შესწავლილი ადგილიდან 10.94 µg/m³ იყო, რაც ჯანმოს რეკომენდაციაზე (5 µg/m³) დაახლოებით ორჯერ მაღალია.

PM10 –ის მედიანური მაჩვენებელი 17.40 µg/m³ იყო (ჯანმოს რეკომენდაცია 15 µg/m³-ს წარმოადგენს), NO2-ის კი – 17.73 µg/m³, რაც ჯანმოს სტანდარტზე, 10 µg/m³–ზე, მეტია.

ადგილები ჰაერის დაბინძურების ყველაზე მაღალი მაჩვენებლებით თავმოყრილი იყო ისეთ ქალაქებში, როგორებიცაა: ლონდონი, ბირმინგემი, მანჩესტერი და ლიდსი. სკოლის ასაშენებლად შერჩეული ადგილები ლივერპულში, ბრისტოლსა და ნიუკასლში შედარებით ნაკლებად დაბინძურებული იყო. დევონისა და კორნუოლის საგრაფოებში კი დაბინძურების ყველაზე დაბალი მაჩვენებლები დაფიქსირდა.

კვლევითმა ჯგუფმა აღნიშნა, რომ სასკოლო განაცხადების რეკომენდაციებში არ შედის შემოთავაზებულ ადგილებში ჰაერის ხარისხის შემოწმების არცერთი მოთხოვნა.

მათი თქმით, ჰაერის ხარისხის შემოწმება ნებისმიერი ახალი სკოლის მშენებლობის შემოთავაზებისა და დაგეგმარების ეტაპში სავალდებულო უნდა იყოს და რომ კანონმდებლობა სასწრაფოდ გასაახლებელია.

სტატიაზე მუშაობდა: გიორგი ქარქუზაშვილი, ნინი თოიძე, თამთა კიკვაძე

წყარო: Airqualitynews.com

3 ივნისი 2024 წელი