ბოლო ორი წლის მანძილზე ლონდონში, დაბინძურებული ჰაერის შედეგად გამოწვეულმა ასთმის დიაგნოზმა 1700-ზე მეტი ადამიანის ჰოსპიტალიზება გამოიწვია

• ლონდონის საიმპერიო კოლეჯის ბოლო კვლევებმა აჩვენა, რომ 2017-2019 წლებში, ლონდონში, ჰაერის დაბინძურების შედეგად გამოწვეული ასთმისა და ფილტვების დაავადებების გამო 1700-ზე მეტი ადამიანის ჰოსპიტალიზება გახდა საჭირო. 

• ამავე წლებში, ქალაქში ჰაერის დაბინძურება ასთმით დაავადებული ბავშვების 7%-ზე არის პასუხისმგებელი.

• ლონდონის მერმა სადიკ ხანმა (Sadiq Khan) დღევანდელ ანალიზს “მკვეთრი შეხსენება” უწოდა და ლონდონის მოსახლეობას კიდევ ერთხელ გაუმეორა, რომ დაბინძურებული ჰაერი მათ ჯანმრთელობაზე ნეგატიურ გავლენას ახდენს.

ლონდონის საიმპერიო კოლეჯის ბოლო კვლევებმა აჩვენა, რომ 2017-2019 წლებში, ლონდონში, ჰაერის დაბინძურების შედეგად გამოწვეული ასთმისა და ფილტვების დაავადებების გამო 1700-ზე მეტი ადამიანის ჰოსპიტალიზება გახდა საჭირო.

ამავე წლებში, ქალაქში ჰაერის დაბინძურება ასთმით დაავადებული ბავშვების 7%-ზე არის პასუხისმგებელი. მიუხედავად ამისა, მკვლევრებმა დაამტკიცეს, რომ ჰაერის ხარისხის გაუმჯობესებამ მოცემული დაავადებების გამო ჰოსპიტალიზებული ადამიანების მაჩვენებელი, რომელიც 2014-2016 წლებში 2450-ს შეადგენდა, 30%-ით შემცირდა.

ანალიზს ემატება მზარდი მტკიცებულებები იმის თაობაზე, რომ ჰაერის დაბინძურების შესამცირებლად გაბედული, ქმედითი ნაბიჯების გადადგმაა საჭირო, განსაკუთრებით კი კლიმატის ცვლილებისა და დედაქალაქში არსებული საცობების მიმართულებით.

ლონდონის მერმა სადიკ ხანმა (Sadiq Khan) დღევანდელ ანალიზს “მკვეთრი შეხსენება” უწოდა და ლონდონის მოსახლეობას კიდევ ერთხელ გაუმეორა, რომ დაბინძურებული ჰაერი მათ ჯანმრთელობაზე ნეგატიურ გავლენას ახდენს.

„ლონდონის ტოქსიკური ჰაერი აზიანებს ადამიანების ჯანმრთელობას, რაც მათ ჰოსპიტალიზაციას იწვევს. უახლესი კვლევები არის კიდევ ერთი მკვეთრი შეხსენება იმის თაობაზე, რომ ჰაერის დაბინძურება ლონდონის მცხოვრებლების ჯანმრთელობას აზიანებს. ჩვენ ყველაფერი უნდა გავაკეთოთ იმისათვის, რათა ბავშვები, მოხუცები და რესპირატორული პრობლემების მქონე ადამიანები დაბინძურებული ჰაერისგან დავიცვათ.“ – განაცხადა ბატონმა ხანმა.

„ლონდონში უკვე მიღწეულია დიდ პროგრესი ჰაერის დაბინძურებისა და ნახშირბადის ემისიების შემცირების მხრივ, თუმცა, ჯერ კიდევ დიდი გზაა გასავლელი. ჩვენ არ შეგვიძლია ადამიანის ჯანმრთელობის საკითხი გადავდოთ, ახლა ქმედება აუცილებელია.“

„ლონდონში ჰაერის დაბინძურება განაგრძობს ასთმითა თუ COPD-ით დაავადებულ ადამიანთა მდგომარეობის გაუარესებასა და მათ ჰოსპიტალიზებას, თუმცა კარგია, რომ 2016 წელთან შედარებით მაჩვენებელი შემცირებულია. ლონდონში ჰაერის მდგომარეობის გაუმჯობესების მიმართულებით გატარებულმა პოლიტიკამ უნდა შეამციროს როგორც მოცემული მონაცემები, ასევე ჰაერის დაბინძურების შედეგად ჯანმრთელობაზე  მიყენებული მავნე ზემოქმედება.“ – განაცხადა Imperial’s Environmental Research Group-ის უფროსმა მომხსენებელმა, დოქტორ ჰეზერ უოლტონმა (Dr Heather Walton).

„ლონდონში მცხოვრები ბავშვები უკეთეს გარემოს იმსახურებენ. ათასობით ბავშვი ჰაერის დაბინძურების შედეგად ძლიერ დაზარალდა. ჩემი შვილი ხიხინის გამო არაერთხელ საავადმყოფოში გადაუყვანიათ, ეს საკმაოდ მძიმე ეპიზოდია… არცერთი ბავშვი ან  თუნდაც ზრდასრული მსგავს სტრესს არ უნდა განიცდიდეს. ჩვენ მოვუწოდებთ პოლიტიკოსებს გაერთიანდნენ და განაგრძონ ლონდონში ჰაერის ხარისხის გაუმჯობესება, რათა უკეთესი მომავალი უზრუნველყონ და დაბინძურებული ჰაერის პრობლემა სამუდამოდ წარსულს ჩააბარონ.“ – განაცხადა რიგითმა დედამ და კამპანია Mums for Lungs-ის წევრმა, რუთ ფიცჰარისმა (Ruth Fitzharris).

სტატიაზე მუშაობდა : ქეთო გობრონიძე და ლიზი უგულავა

წყარო : airqualitynews.com