ხუთი აეროპორტი მთელ შვედეთზე მეტ CO2-ს გამოყოფს
ევროპის ხუთი უმსხვილესი აეროპორტი მთელი შვედეთის ეკონომიკაზე მეტ CO2-ს გამოყოფს, აჩვენებს აეროპორტის ახალი ტრეკერი.
ODI-ის, ტრანსპორტისა და გარემოს და ეკოლოგიურად სუფთა ტრანსპორტის საერთაშორისო საბჭოს (ICCT) მიერ შექმნილი ტრეკერი დაადგენს, ისტორიაში პირველად, უშუალოდ რამდენი CO2 გამოიყოფა აეროპორტებიდან გამგზავრებული თვითმფრინავებიდან.
ლონდონი ჰითროუ, პარიზი შარლ დე გოლი, ფრანკფურტი, ამსტერდამი სხიპხოლი და მადრიდი ბარახას აეროპორტების სამგზავრო რეისები გამოყოფს 53 მილიონ ტონა CO2-ს, რომელიც საწვავზე გადასახადით დაუბეგრავი რჩება და რომლის 15%-ზე ნაკლები აღირიცხება ევროკავშირისა და დიდი ბრიტანეთის გამონაბოლქვის კვოტირებისა და ვაჭრობის სისტემის სქემებში.
მოცემულ სქემებში შედის მხოლოდ ადგილობრივი და ევროკავშირის ფრენები, რაც ნიშნავს, რომ რეისები ევროკავშირის ტერიტორიიდან არ აღირიცხება.
მაგალითად, პარიზი შარლ დე გოლის გამონაბოლქვის 80%-ს შორი რეისები ქმნის, ხოლო პატარა აეროპორტების, როგორიცაა კრაკოვი, ფრენების უმრავლესობა ხანმოკლეა.
ამგვარად, პატარა აეროპორტების დაბინძურება დიდებზე მეტად იბეგრება მაშინ, როცა დიდები ხანგრძლივ ფრენებს უზრუნველყოფს და მეტ გამონაბოლქვს წარმოქმნის.
ჯო დარდენმა, T&E-ის საავიაციო მენეჯერმა თქვა: “მანქანებისა და ელექტროსადგურებისგან განსხვავებით, ავიაციური გამონაბოლქვის უმეტესობა ევროპის საზღვრებს გარეთ გამოიყოფა და ევროპის აეროპორტების ემისიების მნიშვნელოვანი წილი ყურადღების მიღმა რჩება. ყველა რეისი უნდა იყოს ჩართული გამონაბოლქვის სავაჭრო სისტემაში, და არა მხოლოდ ევროპის შიდა ფრენები.
ახლა ჩვენ უკვე ვხედავთ აეროპორტის გამონაბოლქვის საგანგაშო მასშტაბებს და ნათელია, რომ საავიაციო სექტორი დაბინძურების შესაჩერებლად საკმარისს არ აკეთებს. ჩვენ ვერ გავამართლებთ აეროპორტების გაფართოებას კლიმატური კრიზისის პირობებში.”
აღნიშნული უმსხვილესი აეროპორტებიდან ყველას აქვს გაფართოების გეგმა, რომელთაგან ყველაზე აღსანიშნავია ჰითროუ. ჰითროუ, რომლის დაგეგმილი გაფართოება კოვიდის გამო გადაიდო, აეროპორტის გამონაბოლქვის დონით მსოფლიოში მეორე ადგილზეა. მისი 16,2 მილიონი ტონა CO2 ყოველწლიურად 8,1 მილიონი მანქანის ექვივალენტია.
ნახშირბადის ეს არადოკუმენტირებული და დაუბეგრავი გამონაბოლქვი აეროპორტის გაფართოების საკითხის განხილვისას მეტად მნიშვნელოვანია, განაცხადა NGO-ების კოალიციამ. საავიაციო სექტორის ემისიები 2013-დან 2018 წლამდე წელიწადში 5%-ით იზრდებოდა და გლობალური CO2 გამონაბოლქვის 2,5%-ს მიაღწია – გამონაბოლქვით მსოფლიოში მეშვიდე ადგილზე იქნებოდა, ქვეყანა რომ ყოფილიყო.
სტატიაზე მუშაობდა : ნატალია სლეპაკოვა
წყარო : airqualitynews.com