ველოსიპედი – ყველაზე სწრაფი გზა მიზანთან
ევროპის დიდ ქალაქებში, ჰაერის ხარისხის გასაუმჯობესებლად, სხვადასხვა ტიპის პროექტი ხორციელდება. პროექტები მიზნად ისახავენ ურბანული ინფრასტრუქტურის განახლებას და თანამედროვე საჭიროებებზე მორგებას.
დიზელზე მომუშავე ავტომობილების აკრძალვის პარალელურად, აქტიურად ვითარდება ველობილიკები. როდესაც საქმე ველობილიკის განვითარებას ეხება, ნიმუშისთვის ქალაქ კოპენჰაგენს ირჩევენ. კოპენჰაგენში, გადასაადგილებლად, მანქანაზე უფრო ხშირად, ველოსპედს იყენებენ. ქალაქში არსებული მინიმუმ 400-კილომეტრიანი ველობილიკის ქსელი, ყველაზე სწრაფ გადაადგილებას უზრუნველყოფს. გამოკითხვის მიხედვით, სწორედ ამ მიზეზით ირჩევს მოსახლეობის დიდი ნაწილი ველოსიპედს და არა სხვა სატრანსპორტო საშუალებას.
ევროპის დიდ ქალაქებში ცდილობენ მოსახლეობისთვის საზოგადოებრივი ტრანსპორტი უფრო მომხიბვლელი გახადონ. დაგეგმილი ცვლილებები ეხება შეღავათიანი მგზავრობის საფასურს, გამართულ გრაფიკსა და მარშრუტს, რომელიც მინიმალურ მოლოდინისა და მგზავრობის დროს ითვალისწინებს. ამ ცვლილებებით, ქალაქების მესვეურები იმედოვნებენ, რომ უფრო მეტი ადამიანი გამოიყენებს საზოგადოებრივ ტრანსპორტს, რაც მოძრაობის განტვირთვას და ჰაერის ხარისხის გაუმჯობესებას გამოიწვევს. ამ საკითხში, ხშირად, ავსტრიის დედაქალაქის გამოცდილებას იყენებენ. წლიური სამგზავრო ბარათის შეძენის შემთხვევაში, ვენაში მგზავრობის საფასური დღეში მხოლოდ ერთი ევროა. 365 ევროიანი ბილეთის შემოღების შემდეგ კი, აქ მნიშვნელოვნად გაიზარდა საზოგადოებრივი ტრანსპორტის მგზავრთა რაოდენობა.
დამატებითი ღონისძიების სახით ხდება ჭკვიანი შუქნიშნების დამონტაჟება, რაც ტრანსპორტის შეყოვნების დროს ამცირებს და, თავის მხრივ, დადებითად მოქმედებს ჰაერის ხარისხზე.
სტატიაზე მუშაობდა : მეგი წერეთელი და ანა კუხაშვილი