ტაილანდში გამონაბოლქვის, კვამლისა და დაბინძურებული ჰაერის გამო ერთ კვირაში 200 000 ადამიანის ჰოსპიტალიზება გახდა საჭირო

• ფეხმძიმე ქალები, ბავშვები და მოხუცები გააფრთხილეს, რომ დარჩენილიყვნენ სახლებში, ხოლო გარეთ მყოფებს მოუწოდეს, ეტარებინათ დაბინძურების საწინააღმდეგო N95 ნიღბები.
• წლის დასაწყისიდან ტაილანდში 1.3 მილიონზე მეტი ადამიანი დაავადდა ჰაერის დაბინძურებისგან, რაც სტატისტიკურად იმაზე მეტ ადამიანს კლავს, ვიდრე მოწევა ან ჭარბწონიანობა.
• ტაილანდში ჰაერის დაბინძურების ძირითადი წყარო სასოფლო-სამეურნეო ნარჩენების წვაა, რაც, სამთვიანი აკრძალვის მიუხედავად, მაინც გრძელდება.

მანქანის გამონაბოლქვის, ინდუსტრიული დაბინძურებისა და სასოფლო-სამეურნეო ნარჩენების წვის შედეგად გამოყოფილმა მოყვითალო – მონაცრისფრო ნისლმა ტაილანდის ორი უდიდესი ქალაქი,  ბანგკოკი და ჩიანგ მაი, დაფარა. შედეგად,  კვირის განმავლობაში 200 000 ადამიანის ჰოსპიტალიზება მოხდა.

ფეხმძიმე ქალები, ბავშვები და მოხუცები გააფრთხილეს, რომ დარჩენილიყვნენ სახლებში, ხოლო, გარეთ მყოფებს მოუწოდეს, ეტარებინათ დაბინძურების საწინააღმდეგო N95 ნიღბები. ქალაქის მასშტაბით არსებულმა ბაგა-ბაღებმა ოთახები აღჭურვეს ჰაერის გამწმენდებით ბავშვების დაბინძურებისგან დასაცავად.

ჯანდაცვის მაღალჩინოსანმა გამოაცხადა, რომ წლის დასაწყისიდან ტაილანდში 1.3 მილიონზე მეტი ადამიანი დაავადდა ჰაერის დაბინძურებისგან, რაც სტატისტიკურად იმაზე მეტ ადამიანს კლავს, ვიდრე მოწევა ან ჭარბწონიანობა. მსოფლიო ჯანდაცვის ორგანიზაციის „გლობალური ჰაერის მდგომარეობის“ ანგარიშის მიხედვით, 2019 წელს ტაილანდში ჰაერის დაბინძურებისგან გამოწვეული სიკვდილიანობის მაჩვენებელი თითქმის 8% იყო (41 000 შემთხვევაზე მეტი), რომელთაგან PM2.5 მყარი ნაწილაკები მთავარ რისკს წარმოადგენდა.

ტაილანდის ჯანდაცვის მდივანმა,  ოპარტ კარნკავინპონგმა, გადანაცხადა: „PM2.5 ნაწილაკების დონე კუბურ მეტრში 51 მიკროგრამს აღწევდა უწყვეტად სამი დღის განმავლობაში თხუთმეტ პროვინციაში, რამაც ადამიანის ჯანმრთელობაზე ცუდად იმოქმედა. დაბინძურების დონე წელს უფრო მაღალია წინა ორ წელთან შედარებით. პამდემიის გამო გადაადგილების შემცირებამ ჰაერის დაბინძურებაც შეამცირა.

Greenpeace Thailand-ის ჰაერის დაბინძრების კამპანიის მონაწილემ, ალია მაუნ-ობმა, „თავისუფალ რადიო აზიასთან“ საუბრისას განაცხადა: „ეს საშიში და ყველაზე უარესია, რაც კი აქამდე გვინახავს. აქამდე ჩიანგ მაიში მთების დანახვა შეგვეძლო, ახლა კი აღარ. ბანგკოკში მაღალი შენობები სმოგშია ჩაკარგული. ეს „პოსტ-კოვიდური“ სიტუაციაა, როცა კვლავ ჩვეულ მდგომარეობას ვუბრუნდებით. წელს ტაილანდში განსაკუთრებით ცუდი სიტუაციაა.  ასევე, წელს ნაკლები სიხშირითაც წვიმს წინა წელთან შედარებით.“

ტაილანდში ჰაერის დაბინძურების ძირითადი წყარო სასოფლო სამეურნეო ნარჩენების წვაა, რომელიც სამთვიანი აკრძალვის მიუხედავად მაინც გრძელდება.

სტატიაზე მუშაობდა : მარიამ სიხარულიძე და იამზე მარკოიძე

წყარო : airqualitynews.com

3 აპრილი 2023 წელი