სტოკჰოლმის ცენტრში ბენზინსა და დიზელზე მომუშავე მანქანების შესვლა აიკრძალა

• 2024 წლის ბოლოს სტოკჰოლმში ქალაქის გარკვეული ნაწილები დაბალი ემისიების ზონებად გამოცხადდება, სადაც ბენზინსა და დიზელზე მომუშავე მანქანების შესვლა აიკრძალება;

• ზონა იფუნქციონირებს დღეში 24 საათი, კვირაში 7 დღე;

• ზონის წესების დარღვევა ჩაითვლება საგზაო მოძრაობის დარღვევად და დამრღვევი პირი დაჯარიმდება 1000 სეკით, რაც დაახლოებით 85€ არის.

2024 წლის ბოლოს სტოკჰოლმში ქალაქის ცენტრის გარკვეული ნაწილები დაბალი ემისიების ზონებად გამოცხადდება, სადაც ბენზინსა და დიზელზე მომუშავე მანქანების შესვლა აიკრძალება. მიღებული გადაწყვეტილების მიზანია ქალაქის შიგნით არსებული დაბინძურების აღმოფხვრა.

სტოკჰოლმში ჰაერის დაბინძურება მწვავე პრობლემაა. სამედიცინო კვლევები აჩვენებს, რომ სტოკჰოლმის იმ ქუჩებზე მცხოვრებ ბავშვებს, რომლებზეც ჰაერი განსაკუთრებულადაა დაბინძურებული, ფილტვების დაქვეითებული ფუნქციონირება აქვთ ადრეული ასაკიდან.

ლარს სტრომგრენი სტოკჰოლმის ტრანსპორტისა და ქალაქის ურბანული გარემოსდაცვის მერი ამბობს: „ჰაერის დაბინძურება ჩვილი ბავშვების ფილტვებს ვნებს და ადამიანთა ნაადრევ სიკვდილს იწვევს. აუცილებელია, აღმოვფხვრათ მავნე გაზების გამოფრქვევა ბენზინსა და დიზელზე მომუშავე მანქანებიდან. სწორედ ამ მიზნით, დათქმულ ვადაში გთავაზობთ ისეთ ამბიციურ გეგმას, როგორიც დაბალი ემისიების ზონის შექმნაა“. სტოკჰოლმის დაბალი ემისიების ზონაში შესვლა ნებადართული იქნება მხოლოდ ელექტრო- და გაზზე მომუშავე მანქანებისთვის, რომლებიც აკმაყოფილებს ევრო 6-ის სტანდარტებს. ასევე დაშვებული იქნება ევრო 6-ის ჰიბრიდული მანქანები. ზონა იფუნქციონირებს 24/7-ზე. ზონის წესების დარღვევა ჩაითვლება საგზაო მოძრაობის დარღვევად და დამრღვევი პირი დაჯარიმდება 1000 სეკით.

გარემოსდაცვითი ზონა „კლასი 3“ ამოქმედდება შემდეგი წლის 31 დეკემბრიდან და მოიცავს ქალაქის ცენტრის დაახლოებით 20 ბლოკს. შემდგომ ეტაპზე ზონა კიდევ უფრო გაფართოვდება. გაფართოების შესახებ გადაწყვეტილება მიღებული იქნება 2025 წლის პირველ ნახევარში. ზონაში შესვლის აკრძალვა არ ეხება მოტოციკლებსა და მოპედებს.

სტატიაზე მუშაობდა: მარიამ სიხარულიძე, ანუკი კვეკვესქირი

წყარო: Airqualitynews.com

21 თებერვალი 2024 წელი