საზოგადოებრივი ბაღჩა – განტვირთვა ქალაქელებისთვის
საზოგადოებრივი ბაღჩა არის მიწის ნაკვეთი, რომელსაც ადამიანების გარკვეული ჯგუფი ერთობლივად ამუშავებს. ასეთი ბაღი, უმეტესად, ქალაქში მდებარეობს და ურბანული ბაღის სახელითაც არის ცნობილი. ხშირ შემთხვევაში, ასეთი ბაღჩები დაინტერესებულ პირთათვის ღიაა. მიწის ნაკვეთს, მსგავსი საქმიანობისთვის, ზოგ შემთხვევაში, ქალაქის მმართველობა გამოყოფს, ან სხვადასხვა პროექტის ფარგლებში გაიცემა დროებითი სარგებლობისთვის.
ასეთი ტიპის ბაღჩები, გერმანიის დიდ ქალაქებში დიდი ხანია პოპულარობით სარგებლობს და ქალაქის მაცხოვრებლებს განტვირთვისა და ბუნებასთან სიახლოვის საშუალებას აძლევს. ქალაქში მაცხოვრებლებს საშუალება ეძლევათ თანამოაზრეებთან ერთად შექმნან სივრცე, სადაც ერთობლივად მოუვლიან პატარა მეურნეობას, ერთმანეთს საკუთარ ცოდნასა და გამოცდილებას გაუზიარებენ. ეს დადებითად მოქმედებს ადამიანების ფსიქიკურ და ფიზიკურ ჯანმრთელობაზე. გარდა შრომისა, ბაღჩაში სტუმრობა დასვენებისთვისაც შესაძლებელია.
საზოგადოებრივი ბაღჩების შესაქმნელად ხშირ შემთხვევაში იყენებენ დაუსახლებელი მიწის ნაკვეთებს, საგანმანათლებლო და სოციალური ინსტიტუტების, კლინიკების, უნივერსიტეტების, ბაღებისა თუ სკოლების ეზოებს, პარკების განაპირა სივრცეს. ასეთი სივრცე შემდეგ კრიტერიუმებს უნდა აკმაყოფილებდეს: უნდა გაიცეს მინიმუმ სამი წლით, უნდა იყოს ადვილად მისადგომი მებოსტნეებისთვის, არ უნდა იყოს დაბინძურებული, რათა იქ მოყვანილი ბოსტნეული იყოს საკვებად ვარგისი.
სტატიაზე მუშაობდა : მეგი წერეთელი და ანა კუხაშვილი