საახალწლოდ ლონდონში ნაძვის ხეების გაქირავება დაიწყეს

ნაძვის ხე ახალი წლის განუყრელი ატრიბუტია. ახალი წლის დადგომასთან ერთად, მხოლოდ აშშ-ში 25-30 მილიონი ბუნებრივი ნაძვი იჭრება, რაც ტყის საფარის სიმცირის პრობლემას კიდევ უფრო ამწვავებს. ამას ემატება ისიც, რომ ნაძვების უმეტესობა, საბოლოოდ, ნაგავსაყრელზე ხვდება. მეორე მხრივ, ხელოვნური ნაძვის ხეები მავნე ნივთიერებისგან, პოლივინილის ქლორიდისგან მზადდება, რაც სინთეტიკური თერმოპლასტიკით დაბინძურების კიდევ ერთი წყაროა. ინგლისში ამ გამოუვალი მდგომარეობის გადაჭრის გზა მოძებნეს.

ონლაინ მაღაზია Christmas on the Hill მომხმარებლებს სთავაზობს ნაძვის ხის გაქირავების სერვისს. მაღაზიის მფლობელი, კლერ სლეიტერი, ამ სერვისისთვის ხეებს გლოსტერშირის ფერმიდან იღებს: „ჩვენ ნაძვის ხეებს საყვავილე ქოთნებით ვაქირავებთ, მომხმარებელს შეუძლია ასეთი ნაძვის ხე 3-4 კვირის განმავლობაში გააჩეროს სახლში. შემდეგ, ჩვენ ხეებს ფერმაში ვაბრუნებთ, რათა მათი სიცოცხლისუნარიანობა შენარჩუნდეს და მომავალ წელს ისევ შევძლოთ იმავე ხის გაქირავება“-ამბობს კლერი.

სახლის პირობებში, ამ მცენარეებს მცირეოდენი წყალი და გამათბობლებისგან მოშორებით ყოფნა სჭირდებათ. ფერმაში დაბრუნებული ნაძვის ხეები კი საყვავილე ქოთნებთან ერთად მიწაში ირგვება, რათა შეიქმნას მათთვის საჭირო ბუნებრივი პირობები.

Christmas on the Hill გვაწვდის ინფორმაციას, რომ ყოველწლიურად, დაახლოებით 7 მილიონი ნაძვის ხე ხვდება ნაგავსაყრელზე.

,,ჩემი აზრით, ეს გამოსავალი ყველა პრობლემას აგვარებს“ – ამბობს პინი კრეინი, მაღაზიის მომხმარებელი, რომელმაც ახალი წლისთვის ნაძვის ხე იქირავა.

ამ სერვისით, 2.1-მეტრიანი სიმაღლის ნაძვის ხე 76 ფუნტად (100 ამერიკული დოლარი) ქირავდება.

,,ჩვენ გვიწევს ნაძვის ხეების ტრანსპორტირება ფერმიდან მაღაზიაში და პირიქით, ამასთანავე, გასათვალისწინებელია ნაძვის ხეების მთელი წლის მოვლის ხარჯებიც. შესაბამისად, ნაძვის ხის გაქირავებისა და მოჭრის ფასი, სამწუხაროდ, თითქმის თანაბარია“ – ამბობს მაღაზიის მფლობელი.

ნორვეგიული ნაძვის ხეები, რომლებიც ამ სერვისისთვის გამოიყენება, წელიწადში 30 სმ-ით იმატებს სიმაღლეში. მათი საყვავილე ქოთანში გაჩერება, დაახლოებით, 7 წლის განმავლობაშია შესაძლებელი. როდესაც მცენარის ფესვები საყვავილე ქოთანში ვეღარ ეტევა, ნაძვის ხე აღარ ქირავდება და მიწაში დარგვის შემდეგ აგრძელებს სიცოცხლეს.

სტატიაზე მუშაობდა : ანა კუხაშვილი

წყარო : https://www.weforum.org/agenda/2020/12/londoners-rental-christmas-tree-sustainability/