ფოიერვერკი: ახალი წლის დადგომას ჰაერის დაბინძურებით ვეგებებით
ფოიერვერკი ლამაზი სანახავია, თუმცა მას ბევრი უარყოფითი თვისება აქვს. ახალი წლის საღამოს, ფოიერვერკის გამოყენების შედეგად იმატებს დამწვრობის, მხედველობისა და სმენის დაზიანების შემთხვევები. ფოიერვერკის გამოყენების შედეგად ჰაერი მტვრის მცირე ნაწილაკებით, ხოლო ქუჩები – ნარჩენებით ბინძურდება. ფოიერვერკი სტრესულ გარემოს უქმნის გარეულ ფრინველებსა და ცხოველებს, რომ არაფერი ვთქვათ შეშინებულ შინაურ ცხოველებზე.
გერმანიაში ჩატარებულმა კვლევამ აჩვენა, რომ მხოლოდ გერმანიაში, ყოველწლიურად, ფოიერვერკის მოხმარების შედეგად 4,200 ტონა მტვრის ნაწილაკი (PM10) გამოიყოფა, აქედან დიდი ნაწილი – ახალი წლის ღამეს. ამ კვლევის თანახმად ახალი წლის პირველ დღეს ჰაერის დაბინძურების მაჩვენებელი, წლიურ საშუალო მაჩვენებელზე ბევრად მაღალია.
ფოიერვერკის მტვრის ნაწილაკების შესუნთქვა საფრთხეს უქმნის ადამიანის ჯანმრთელობას. იგი უარყოფითად მოქმედებს სასუნთქ გზებზე, იწვევს გართულებებს ასთმისა და გულსისხლძარღვთა დაავადებების მქონე პაციენტებში.
გერმანიაში, ყოველწლიურად, საშუალოდ 8000 ადამიანი უჩივის ახალი წლის ღამეს, ფოიერვერკისგან გამოწვეულ შიდა ყურის დაზიანებას. ამ ადამიანების დაახლოებით მესამედში, ეს დაზიანება შეუქცევადი ხასიათისაა.
რამდენად სწრაფად იწმინდება ჰაერი ახალი წლის ღამის შემდეგ, დამოკიდებულია ამინდზე. ძლიერი ქარი ხელს უწყობს მტვრის მავნე ნაწილაკების სწრაფად გაფანტვას. სუსტი ქარის პირობებში, ჰაერის დამაბინძურებლები ხანგრძლივი დროის განმავლობაში რჩება ჰაერში და კონცენტრირდება ატმოსფეროს ქვედა ფენებში.
სტატიაზე იმუშავა : მეგი წერეთელი – ანა კუხაშვილი
წყარო : www.umweltbundesamt.de