ნიდერლანდები 5 კვირიან „ლოქდაუნს“ აცხადებს

ნიდერლანდების პრმიერ მინისტრის მარკ რუტეს განცხადებით, ქვეყანაში 5 კვირიანი ლოქდაუნი გამოცხადდება დღეიდან 19 იანვრის ჩათვლით. ამის შესახებ ინფორმაციას BBC-ი ავრცელებს.

გამოცემის მიხედვით, კორონავირუსის გავრცელების პრევენციის მიზნით, ქვეყანაში დაიკეტება არა-აუცილებელი მაღაზიები, კინო-თეატრები, სავარჯიშო დარბაზები, სილამაზის სალონები და სკოლები. ასევე მოქალაქეებს მოუწოდებენ თავი შეიკავონ არაუცილებელი მგზავრობებისგან მარტის შუარიცხვებამდე.

ნიდერლანდების პრემიერ-მინისტრის, მარკ რუტეს თქმით, შობის წინ, მთავრობა გადაწყვეტილების სიმძიმეს აცნობიერებს. ადამიანებს შორის კონტაქტის შემცირების მიზნით, ოფიციალური პირები მოსახლეობას სახლში დარჩენასა და სამსახურებრივი საქმიანობის სახლიდან შესრულებას ურჩევენ.

შეზღუდვების მიხედვით, აიკრძალება ორ ადამიანზე მეტის შეკრება. გამონაკლისი იქნება სამი დღე საშობაოდ, როდესაც სამი სტუმრის მიღება გახდება შესაძლებელი.

ნიდერლანდებში პანდემიის დაწყებიდან დღემდე, კორონავირუსის 632,085 შემთხვევაა გამოვლენილი, მათ შორის ვირუსით 10,168 პაციენტი გარდაიცვალა.