მექსიკა გახდა პირველი ქვეყანა ჩრდილოეთ ამერიკაში, რომელმაც აკრძალა კოსმეტიკური საშუალებების ცხოველებზე ტესტირება

• მექსიკა არის პირველი ქვეყანა ჩრდილოეთ ამერიკაში – და მსოფლიოში 41-ე ქვეყანა – რომელმაც აკრძალა კოსმეტიკის ტესტირება ცხოველებზე.
• ფედერალურმა კანონპროექტმა მექსიკის სენატის ერთსულოვანი მხარდაჭერა მოიპოვა.
• კანონი ასევე კრძალავს იმ კოსმეტიკის იმპორტს, წარმოებას და მარკეტინგს, რომელიც გამოცდილია ცხოველებზე მსოფლიოს ნებისმიერ წერტილში.
• 41-მა ქვეყანამ უკვე ოფიციალურად აკრძალა ეს პრაქტიკა, ასევე ბრაზილიის 10 -მა შტატმა და აშშ-ის 7-მა შტატმა.

ამიერიდან მექსიკა არის პირველი ქვეყანა ჩრდილოეთ ამერიკაში და 41-ე ქვეყანა მსოფლიოში, რომელმაც აკრძალა კოსმეტიკის ტესტირება ცხოველებზე.

ახალი კანონი

ფედერალურმა კანონპროექტმა მექსიკის სენატის ერთსულოვანი მხარდაჭერა მოიპოვა.

კანონპროექტის მომზადებაში დიდი წვლილი მიუძღვის Humane Society International/Mexico-ს და ONG Te Protejo-ს, რომლებმაც საბოლოო შედეგის მისაღებად მრავალწლიანი კამპანია აწარმოეს.

„აღფრთოვანებას ვერ ვმალავთ იმის გამო, რომ მექსიკა გახდა პირველი ქვეყანა ჩრდილოეთ ამერიკაში, რომელმაც აკრძალა კოსმეტიკური საშუალებების ტესტირება ცხოველებზე. გვინდა, მადლობა გადავუხადოთ სენატორ რიკარდო მონრეალს, ჩვენი კანონპროექტის სპონსორს,  და ყველა იმ კონგრესმენ კაცსა და ქალს, ვინც კენჭისყრის დროს ხმა მისცა ცხოველებზე კოსმეტიკის ტესტირების დასრულებას“, ნათქვამია ორი ორგანიზაციის ერთობლივ განცხადებაში.

კანონი ასევე კრძალავს ისეთი კოსმეტიკის იმპორტს, წარმოებას და მარკეტინგს, რომელიც გამოცდილია ცხოველებზე მსოფლიოს ნებისმიერ წერტილში.

ანტონ აგილარი არის Humane Society International/ Mexico-ს  აღმასრულებელი დირექტორი.

მან შემდეგი კომენტარი გააკეთა: „მადლობას ვუხდით მექსიკის მთავრობას ამ მნიშვნელოვან საკითხზე ლიდერობის ჩვენებისათვის და აუცილებლად გავაგრძელებთ მათთან მუშაობას ნაკისრი ვალდებულებების შესასრულებლად და მკაცრი აკრძალვის აღსასრულებლად“.

მან აღნიშნა, რომ ეს გადაწყვეტილება არის „უდიდესი წინგადადგმული ნაბიჯი“ როგორც ცხოველებისა და მეცნიერებისათვის, ასევე მომხმარებლებისთვისაც. 2019 წელს, Humane Society International-ისა და ONG Te Protejo-ს დაკვეთით ჩატარებულმა გამოკითხვამ აჩვენა, რომ მექსიკის მოქალაქეთა 78%-ს „სისასტიკისგან თავისუფალი“ კოსმეტიკა ურჩევნია.

წლების წინ, ორივე ორგანიზაციამ წამოიწყო პეტიცია, რომელიც ითხოვდა მექსიკაში კოსმეტიკური საშუალებების ცხოველებზე ტესტირების აკრძალვას. მათ 1,3 მლნ-ზე მეტი ხელმოწერა მოაგროვეს.

„ერთი ნაბიჯით ახლოს გლობალურ აკრძალვამდე“

კოსმეტიკური საშუალებების ცხოველებზე გამოცდა გლობალური საკითხია. Cruelty Free International-ის მონაცემებით, მსოფლიოში ყოველწლიურად ნახევარ მილიონ ცხოველზე ხდება კოსმეტიკური საშუალებების გამოცდა.

აგილარი იმედოვნებს, რომ მექსიკის ახალ კანონს უფრო ფართო გავლენა ექნება.

41-მა ქვეყანამ უკვე ოფიციალურად აკრძალა ეს პრაქტიკა, ასევე ბრაზილიის 10-მა შტატმა და აშშ-ის 7-მა შტატმა.

ნიუ ჯერსი, ნიუ იორკი და როდ აილენდი ასევე განიხილავენ მსგავს კანონპროექტებს. გარდა ამისა, უახლოს მომავალში ფედერალურ კანონპროექტებს აშშ-სა და კანადაში ხელახლა წარადგენენ.

სტატიაზე მუშაობდა : მაია ბურდული და მეგი რუსია

წყარო : plantbasednews.org