ლიდსის საქალაქო საბჭო ელექტრონული ფოსტით ჰაერის დაბინძურების შესახებ გაფრთხილების სერვისს აამუშავებს

• ლიდსის საქალაქო საბჭომ აამუშავა ახალი ელექტრონული ფოსტის სერვისი, რომელიც მოსახლეობას გააფრთხილებს ჰაერის ხარისხის დაბალი და დაბინძურების მაღალი დონის შემთხვევაში
• პროექტი “სუფთა ჰაერის დღე 2022-ისთვის” განხორციელდა და ადამიანებს ჰაერის დაბინძურებისგან თავის დაცვაში დაეხმარება

იორკშირის ხელისუფლებამ ჩაუშვა ახალი სისტემა “სუფთა ჰაერის დღე 2022-ისთვის”, ამასთან ერთად ჯანდაცვის მუშაკებისა და ჰაერის ხარისხის ექსპერტებისთვის ახალი კონფერენციის შესახებ გამოაცხადა.

ლიდსის საქალაქო საბჭომ აამუშავა ახალი ელექტრონული ფოსტის სერვისი, რომელიც მოსახლეობას გააფრთხილებს ჰაერის ხარისხის დაბალი და დაბინძურების მაღალი დონის შემთხვევაში. სისტემა უკვე ონლაინ-რეჟიმშია და 16 ივნისს “სუფთა ჰაერის დღისთვის” გააქტიურდება.

ინიციატივა წარმოადგენს უფრო ფართო გეგმის ნაწილს, რომელიც მიზნად ისახავს ლიდსში ჰაერის დაბინძურებასთან დაკავშირებული სიკვდილიანობის 5.7%-ით შემცირებას. ის საზოგადოებრივი ჯანმრთელობის ინფორმაციის სახეს იღებს, რომელიც ადამიანებს მოუწოდებს, რომ მოქმედებები ატმოსფერული დონის შესახებ უახლესი რჩევების შესაბამისად შეცვალონ. ეს შეიძლება, ნიშნავდეს სამსახურში მანქანის ნაცვლად ველოსიპედით მისვლას, რაც თავის მხრივ, აფერხებს ჰაერის უფრო მეტად დაბინძურებასა და ხელს უწყობს მოწყვლადი ჯგუფების დაცვას. შეტყობინებები ასევე ხელმისაწვდომი იქნება ხელისუფლების სოციალური მედიის არხებზე. ლონდონის კინგს-კოლეჯის 2019 წლის კვლევამ აჩვენა, რომ ამ ტიპის სქემა ამცირებს მოსახლეობის ექსპოზიციას.

ელექტრონული ფოსტის სერვისის გარდა, ლიდსის საქალაქო საბჭომ ასევე გამოაცხადა ახალი შეკვეთილი ონლაინ-კონფერენცია სახელწოდებით “Every Breath You Treat”, რომელიც დიდი ბრიტანეთიდან ჯანდაცვის პროფესიონალებისა და ჰაერის ხარისხის ექსპერტების გაერთიანებას ისახავს მიზნად. როგორც ამბობენ, კონფერენცია პირველია, რომელიც მთლიანად ეძღვნება ჰაერის დაბინძურების ჯანმრთელობაზე ზემოქმედებას.

საბჭომ ასევე გამოაცხადა გეგმები, რომ იმუშაოს ადგილობრივი პირველადი ჯანდაცვის ქსელებთან, რათა ექიმები და ექთნები 7 000 პაციენტისთვის მოსახერხებელი ბროშურებით უზრუნველყოს, რომელიც შეიცავს რჩევებსა და ინფორმაციას ჰაერის დაბინძურების შესახებ. ბროშურები გარემოსდაცვითი საქველმოქმედო ორგანიზაცია “Global Action Plan”-თან ერთად შეიქმნა.

„მოხარული ვარ, რომ საბჭო და ჯანდაცვის პარტნიორები ერთად მუშაობენ ჰაერის დაბინძურების შესახებ ცნობიერების ასამაღლებლად და ადამიანების დასახმარებლად. დაბინძურებული ჰაერი ყველას აზიანებს, მაგრამ ზოგიერთი ადამიანი უფრო დიდი რისკის ქვეშაა. სასიცოცხლოდ მნიშვნელოვანია, რომ დავეხმაროთ ამ დაუცველ ადამიანებს, გააცნობიერონ რისკები და, რაც მთავარია, იცოდნენ, რისი გაკეთება შეუძლიათ ამის შესაფერხებლად”, – თქვა მრჩეველმა სალმა არიფმა, საზოგადოებრივი ჯანმრთელობისა და აქტიური ცხოვრების წესის აღმასრულებელმა წევრმა.

სტატიაზე მუშაობდა : ანი ქავთარაძე და ანუკი კვეკვესქირი

წყარო : airqualitynews.com