კოლუმბიაში გადაშენებულად მიჩნეული კოლიბრი აღმოაჩინეს

• იშვიათი კოლიბრი, რომელიც 2010 წლიდან აღარ უნახავთ, ხელახლა აღმოაჩინეს.
• ულამაზესი ფრინველი მხოლოდ სიერა ნევადა-დე-სანტა-მარტას ტყეში ბინადრობს და საფრთხის წინაშე ჰაბიტატის კრიტიკულად შემცირების გამო დადგა.
• გარემოსდამცველები ფიქრობენ, რომ ფრინველის აღმოჩენა სახელმწიფოს წაახალისებს, სიერა ნევადა-დე-სანტა-მარტას ტყე სრული განადგურებისგან დაიცვას.

იურგენ ვეგამ, ადგილობრივმა ფრინველებზე დამკვირვებელმა, The Guardian-ს განუცხადა, რომ ის „ემოციებით აღსავსო“, როდესაც შენიშნა მოჭიკჭიკე სანტა მარტას მამრი კოლიბრი, დამახასიათებელი ზურმუხტისფერი ბუმბულით, ლურჯი ყელითა და შავი ნისკარტით.

ვეგამ მოახერხა გადაეღო ფრინველი, რომელიც მანამდე მხოლოდ ორჯერ იყო შენიშნული და აღწერილი, ერთხელ 1946 წელს და მეორედ 2010 წელს, როდესაც სახეობა პირველად გადაიღეს ფირზე.

„მისი დანახვა სრული სიურპრიზი იყო“, – თქვა ვეგამ. „როდესაც პირველად დავინახე კოლიბრი, მაშინვე გავიფიქრე სანტა მარტას კოლიბრზე. ვერ ვიჯერებდი, რომ ის იქ მელოდა, ჩემი კამერის ამოსაღებად და გადასაღებად“.

სანტა მარტას კოლიბრი, როგორც კრიტიკულად საფრთხის ქვეშ მყოფი, ჰაბიტატის (ცოცხალი ორგანიზმების არსებობისათვის შესაფერისი გარემოს) კრიტიკულად შემცირების გამო, გადაშენებულად მიაჩნდათ. მეცნიერთა ვარაუდით, სიერა ნევადა-დე-სანტა-მარტას ტყის მხოლოდ 15 % რჩება ხელუხლებელი, ტყის დიდი ნაწილი ხეების ჭრის შედეგად განადგურდა ან მოიჭრა ყავის და კაკაოს მოსაყვანად და პირუტყვის მოსაშენებლად. კლიმატის ცვლილებამ, გახანგრძლივებულმა მშრალმა სეზონმა, კიდევ უფრო დიდი საფრთხე შეუქმნა ტყეს. კვლევების მიხედვით, მშრალი, გვალვიანი ამინდები ზრდის ტყის ხანძრების რისკს.

გარემოსდამცველები იმედოვნებენ, რომ კოლიბრის აღმოჩენა ჩინოვნიკებს წაახალისებს, უკეთ დაიცვან ის, რაც ტყისგან დარჩა.

სტატიაზე მუშაობდა : ალექსანდრე ფიფია და ანა ახალაძე

წყარო : www.enn.com

27 სექტემბერი 2022