ჰაერის დაბინძურებამ COVID-19-ით დაავადებულთა საავადმყოფოში ყოფნის დღეების რაოდენობა გაზარდა
-
ბელგიასა და დანიაში ჩატარებულმა ორმა განსხვავებულმა კვლევამ აჩვენა, რომ ჰაერის დაბინძურება, მცირე რაოდენობითაც კი, აუარესებს COVID-19-ით ავადმყოფობას, ზრდის მის მიერ გამოწვეულ ჰოსპიტალიზაციის რისკს და საშუალოდ 4 დღეს ამატებს საავადმყოფოში ყოფნის დღეებს.
-
მათ დაასკვნეს, რომ ევროკავშირის მიერ ამჟამად დადგენილი ჰაერის დაბინძურების ზღვარზე მნიშვნელოვნად დაბალი მაჩვენებელიც კი ზრდის COVID-19-ის ინფიცირებისა და ჰოსპიტალიზაციის რისკს, ასევე მის შედეგად გამოწვეულ სიკვდილიანობას.
-
კვლევის ავტორმა, კოპენჰაგენის უნივერსიტეტის (დანია) დოქტორმა, ზორანა ჯოვანოვიკ ანდერსენმა, განაცხადა: ,,ეს შედეგები აჩვენებს, როგორ შეუძლია ჰაერის დაბინძურებას რისკის ქვეშ დააყენოს ჩვენი იმუნური სისტემა და ხელი შეუწყოს COVID-19-სა და სხვა რესპირატორულ დაავადებას.“
ბელგიასა და დანიაში ჩატარებულმა ორმა განსხვავებულმა კვლევამ აჩვენა, რომ ჰაერის დაბინძურება, მცირე რაოდენობითაც კი, აუარესებს COVID-19-ით ავადმყოფობას, ზრდის მის მიერ გამოწვეულ ჰოსპიტალიზაციის რისკს და საშუალოდ 4 დღეს ამატებს საავადმყოფოში ყოფნის დღეებს.
ბელგიური კვლევა, ჰასელტის უნივერსიტეტის პროფესორ ტიმ ს. ნავროტის ხელმძღვანელობით, 2020-2021 წლის მაისის შუალედში 328 COVID-19-ით ჰოსპიტალიზებულზე დაკვირვებას მოიცავდა.
გუნდმა მოიპოვა NO2-ის, მტვრის, PM2.5 ნაწილაკების მონაცემები საცხოვრებელ ადგილებში პაციენტების COVID-19-ით ჰოსპიტალიზაციამდე. ასევე გაზომეს პაციენტების სისხლში მტვრის რაოდენობა.
ეს მონაცემები კლინიკურ შედეგებს შეადარეს, მათ შორის, ინტენსიური თერაპიის შედეგებსა და საავადმყოფოდან გაწერისთვის საჭირო დღეების რაოდენობას. გუნდმა ასევე გაითვალისწინა სხვა ფაქტორები, რომელსაც, როგორც აღიარებულია, გავლენა აქვს COVID-19-ით ინფიცირებაზე ასაკის, სქესისა და სხეულის მასის ინდექსის მიხედვით.
აღმოჩნდა, რომ დაბინძურების უფრო მაღალი დონე იწვევდა COVID-19-ით ინფიცირებულებისთვის ჰოსპიტალიზაციის საშუალოდ ოთხ დამატებით დღეს.
შედეგებმა ასევე აჩვენეს, რომ ოთხი წლის განმავლობაში აზოტის დიოქსიდისა და მტვრის შემცველობის მაღალი მაჩვენებელი ნიშნავდა, რომ COVID-19-ის მქონე პაციენტები საავადმყოფოში უფრო მეტ დროს გაატარებდნენ. თუ პაციენტების სისხლშიც აღმოჩნდებოდა მტვრის ნაწილაკები, ინტენსიური თერაპიის საჭიროების ალბათობა 36%-ით იზრდებოდა.
პროფესორმა ნავროტმა თქვა: ,,ჩვენი დასკვნების მიხედვით, ჰაერის დაბინძურების გავლენის ქვეშ მყოფი ადამიანები, თუნდაც მცირე ზეგავლენის ქვეშ, შედარებით უფრო ცუდად იყვნენ. პანდემიამ უზარმაზარი ტვირთი აჰკიდა ექიმებს, მედდებსა და ჯანდაცვის სხვა მუშაკებს. ჩვენმა კვლევამ აჩვენა, რომ ჰაერის დაბინძურებამ ეს ტვირთი უფრო დაამძიმა.“
დანიელმა მკვლევრებმა გამოიყენეს, დანიის ეროვნულ სისტემაში არსებული, პანდემიის პირველი 14 თვის მონაცემები და პაციენტების საცხოვრებელი ადგილების ბოლო 20 წლის დეტალური ინფორმაცია ჰაერის დაბინძურების შესახებ.
მათ დაასკვნეს, რომ ევროკავშირის მიერ ამჟამად დადგენილი ჰაერის დაბინძურების ზღვარზე მნიშვნელოვნად დაბალი მაჩვენებელიც კი ზრდის COVID-19-ის ინფიცირებისა და ჰოსპიტალიზაციის რისკს, ასევე მის შედეგად გამოწვეულ სიკვდილიანობას.
გარკვეული დაავადებების: გულის პათოლოგიების, ასთმის, დიაბეტის, დემენციისა და უფრო მძიმე დიაგნოზის მქონე პაციენტები მეტად მიდრეკილნი იყვნენ ჰაერის დაბინძურებისა და COVID-19-ის მიერ გამოწვეული დამაზიანებელი ზეგავლენისადმი.
კვლევის ავტორმა, კოპენჰაგენის უნივერსიტეტის (დანია) დოქტორმა, ზორანა ჯოვანოვიკ ანდერსენმა, ბრძანა: “ეს შედეგები აჩვენებს, როგორ შეუძლია ჰაერის დაბინძურებას რისკის ქვეშ დააყენოს ჩვენი იმუნური სისტემა და ხელი შეუწყოს COVID-19-სა და სხვა რესპირატორულ დაავადებას“.
სტატიაზე მუშაობდა: გიორგი ქარქუზაშვილი, იამზე მარკოიძე
წყარო: Airqualitynews.com
12 იანვარი 2024 წელი