Google Maps გეგმავს მომხმარებლებს ეკო-მეგობრული ტრანსპორტის შესახებ მეტი ინფორმაცია შესთავაზოს
Google-მა გამოაცხადა ცვლილებები, რომლებითაც კომპანიის გარკვეული პროდუქტები წელს დატვირთული იქნება. რუკას დამატებული ახალი ფუნქციები მომხმარებელს მისცემს საშუალებას მიიღოს დროული ინფორმაცია ამინდსა და ჰაერის ხარისხზე, ასევე გადაადგილდეს გარემოსთვის მეგობრული მარშრუტებით. საერთო ჯამში ასამდე ცვლილება, რომლებიც ძირითადად ხელოვნური ინტელექტის გამოყენების შედეგია, დაემატება Google Maps-ის აპლიკაციას 2021 წელს.
სულ მალე თქვენ შეძლებთ რუკაზე მონიშნოთ ზუსტად ის ადგილი აეროპორტში, სადგურსა თუ სავაჭრო ცენტრში, სადაც უნდა მიხვიდეთ. Live View (გამოსახულების პირდაპირ რეჟიმში გადმოცემა) ტექნოლოგიით სარგებლობა მალე შენობების შიგნითაც იქნება შესაძლებელი, რაც დაგეხმარებათ იპოვოთ სასურველი მაღაზია, სხვადასხვა ტრანსპორტის გაჩერების ადგილი ან თუნდაც საპირფარეშო. ეს ფუნქცია უკვე მუშაობს ამერიკის შეერთებულ შტატებში და მალე დაემატება ტოკიოსა და ციურიხში.
რამდენიმე თვეში Google დაამატებს ამინდის ახალ შრეს რუკაზე, რაც მომხმარებელს მიცემს საშუალებას სწრაფად ნახოს ლოკალური პროგნოზი და ტემპერატურა. კიდევ ერთი შრე დაემატება ჰაერის ხარისხისთვის, პირველად ეს ფუნქცია ხელმისაწვდომი იქნება აშშ-ში, ინდოეთსა და ავსტრალიაში და შეამოწმებს ჰაერის დაბინძურების სხვადასხვა კომპონენტს.
Google ასევე მომხმარებელს შესთავაზებს ისეთ მარშრუტებს, რომლებითაც ყველაზე ნაკლებად დაბინძურდება გარემო. ამის მისაღწევად აპლიკაცია რამდენიმე ფაქტორს გაითვალისწინებს, მათ შორის საწვავის მოხმარებას გზის დახრისა და გზებზე საცობების მიხედვით. რუკა ასევე გამოყოფს ველოსიპედის გზას, თუმცა, რა თქმა უნდა, შესაძლებელი იქნება უფრო სწრაფ მარშრუტზე გადასვლა.
პარიზიდან ჯაკარტამდე და ჯაკარტიდან ამსტერდამამდე უამრავი ქალაქი აწყობს ზონებს, რომლებიც ხელს შეუწყობს ნაკლებად დამაბინძურებელი გარემოს შექმნას. ასეთი ზონები ზღუდავს გარკვეული ტიპის მანქანებს. ივნისიდან Google Maps-ის მომხმარებლებს აპლიკაცია შეატყობინებს ავტომობილით მოძრაობისას აქვთ თუ არა კონკრეტულ ზონაში შესვლის უფლება და საჭირო შემთხვევაში შესთავაზებს საზოგადოებრივი ტრანსპორტის ალტერნატივას.
სტატიაზე მუშაობდა : შაკო ღლონტი და ნინი თოიძე
წყარო : https://sg.news.yahoo.com/google-maps-wants-offer-users-125704538.html