კენია პირველად აღწერს ველური ბუნების ბინადარებს
ცოტა ხნის წინ კენიამ დაიწყო ველური ბუნების ბინადართა პირველი ეროვნული აღწერა, რომლის მიზანია კონსერვაციისთვის ხელშეწყობა და ასევე იმ საფრთხეების გამოვლენა, რომელიც ემუქრება ველური ბუნების ბინადართ, მიუხედავათ იმისა, რომ ცხოველთა უზარმაზარი პოპულაცია არსებობს ქვეყანაში. აღწერის პროცესი ივლისამდე გაგრძელდება. ამ პერიოდის განმავლობაში, რეინჯერები, მკვლევარები და ადგილობრივი მოსახლეობა ცხოველებს დაითვლიან ხმელეთზე, აგრეთვე ვერტმფრენებიდან.
აღწერის დროს განსაკუთრებული ყურადღება მიექცევა იშვიათი სახეობების დათვლას, როგორიცაა პანგოლინი, ის გამოვლენილია როგორც პოტენციური შუამავალი სახეობა COVID-19-სთვის და საბელი ანტილოპა, რომელთა რაოდენობა 100-ზე ნაკლებია დარჩენილი კენიაში.
დასახლებების გაფართოებამ, კლიმატის ცვლილებამ, რომელიც რესურსების სიმწირეს იწვევს და ასევე ბრაკონიერობამ ხელი შეუწყო ველური ბუნების ბინადართა პოპულაციების შემცირებას. აფრიკის ველური ბუნების ფონდის მონაცემებით, ბოლო სამი ათწლეულის განმავლობაში კენიაში ჟირაფების რაოდენობა დაახლოებით 40%-ით შემცირდა.
კენიის ველური ბუნების სამსახურმა (KWS) და ტურიზმის სამინისტრომ დაიწყო 250 მილიონი შილინგის (2.3 მილიონი დოლარი) მასშტაბური პროექტი Shimba Hills National Reserve-ში. ადგილი, სადაც კენიის შემორჩენილი საბელი ანტილოპები ბინადრობენ.
კენიის ზოგიერთი ყველაზე დაუცველი ცხოველი, როგორიცაა: მარტორქა და სპილოები პერიოდულად ითვლება ხოლმე, თუმცა ამ აღწერით, როდესაც ცხოველებს სისტემატურად დაითვლიან ქვეყნის ყველა რაიონში პირველად მოხდება.
“ჩვენ კარგად გვესმის, რომ არსებობს მნიშვნელოვანი ხარვეზები. ალბათ ბევრი რამ არ ვიცით იმის შესახებ, თუ რა ხდება ჩრდილოეთ კენიაში”, – განაცხადა ვინი კიირუმ, კენიის ველური ბუნების კვლევის სასწავლო ინსტიტუტის თავმჯდომარის მოვალეობის შემსრულებელმა.
კენიის ჩრდილოეთში ნაკლებად დასახლებულ და ნაკლებად მონახულებად პარკებში ველური ბუნების ბინადართა შესახებ დეტალური ინფორმაცია საკმაოდ მწირია.
ამ აღწერის მიზანია, დადგინდეს ცხოველთა პოპულაციების ზომები და მათი ტერიტორიული გადანაწილება, ასევე გამოვლინდეს ის საფრთხეები, რომლებიც მათ ემუქრებათ და საბოლოოდ მოხდეს კონსერვაციის სათანადო სტრატეგიების შემუშავება.
მსოფლიო მოგზაურობისა და ტურიზმის საბჭოს მონაცემებით, 2019 წელს ტურიზმი კენიის მშპ-ს 8.2% შეადგენდა, რაც უმეტესწილად ეროვნული პარკებში ვიზიტებზე მოდიოდა, თუმცა COVID-19 პანდემიის დროს ეს რიცხვი მკვეთრად დაეცა.
საერთაშორისო მიმოსვლის შემცირებამ გარკვეული დადებითი შედეგებიც მოიტანა. 1999 წლის შემდეგ, გასული წელი პირველი იყო, როდესაც მარტორქებზე ნადირობა შეწყდა – განაცხადეს კენიის ველური ბუნების სამსახურში.
სტატიაზე მუშაობდა : მაია ბურდული და სალომე აბუაშვილი