დღეში მხოლოდ ერთი ვეგანური კერძის მირთმევა გულ-სისხლძარღვთა დაავადებების გაჩენის რისკს 10%-ით ამცირებს

• გულ-სისხლძარღვთა დაავადებები გარდაცვალების ყველაზე გავრცელებული მიზეზია. კვლევის მიხედვით, მცენარეული პროდუქტებით მომზადებული დღეში მხოლოდ ერთი კერძი მსგავს დაავადებათა გაჩენის რისკს მკვეთრად ამცირებს.
• მკვლევრებმა ხაზი გაუსვეს კერძის მირთმევის დროის სწორად შერჩევის მნიშვნელობას. ხორცისა და ნახშირწყლების მხოლოდ დღის პირველ მონაკვეთში მირთმევაც ამცირებს გულ-სისხლძარღვთა დაავადებების გაჩენის საფრთხეს.

კვლევას გამოცემა Journal of Clinical Endocrinology & Metabolism აქვეყნებს. განსაკუთრებით ხაზგასმულია მცენარეული კერძის ვახშმად მირთმევის მნიშვნელობა. 27 000 ზრდასრული ადამიანის კვების რაციონის შესწავლის შედეგად დადგინდა, რომ იმ ინდივიდებში, რომლებიც საღამოობით რთული ნახშირწყლებით მდიდარ ვახშამს მიირთმევდა გაჯერებული ცხიმების შემცველობის მქონე კერძის მაგივრად,  გულ-სისხლძარღვთა დაავადებების გაჩენის რისკი 10%-ით ნაკლები იყო.

მკვლევრებმა ხაზი გაუსვეს კერძის მირთმევის დროის სწორად შერჩევის მნიშვნელობას. მიუხედავად იმისა, რომ მნიშვნელოვანია დაბალანსებული კვების რაციონის ქონა მთელი დღის განმავლობაში, ხორცისა და ნახშირწყლების მხოლოდ დღის პირველ მონაკვეთში მირთმევაც ამცირებს გულ-სისხლძარღვთა დაავადებების გაჩენის საფრთხეს.

მცენარეული პროდუქტების მნიშვნელობა

თუ მხოლოდ ვახშმად ცხოველურ პროდუქტზე უარის თქმას ამ მასშტაბის ცვლილებების მოხდენა შეუძლია ჩვენს ორგანიზმში, ზოგადად ასეთი პროდუქტების მოხმარების შემცირება გაცილებით დიდ პოზიტიურ გავლენას იქონიებს ადამიანის ჯანმრთელობაზე.

2019 წელს კვლევამ, რომელშიც 10 000 ადამიანი იღებდა მონაწილეობას, ცხადყო, რომ მცენარეული პროდუქტებით დატვირთული კვების რაციონის ქონა 32%-ით ამცირებს გულ-სისხლძარღვთა დაავადებებით გამოწვეულ სიკვდილიანობას. აგრეთვე, ამერიკის გულის ასოციაციის 2018 წლის კვლევის შედეგების მიხედვით, ცხოველური ცხიმის რეგულარული, გადამეტებული მიღება გულის დაავადებით ადამიანის გარდაცვალების რისკს 21%-ით ზრდის.

,,ვეგანი 6 საათამდე“

ზემოხსენებული კვლევა ეწინააღმდეგება პრაქტიკას ,,ვეგანი 6 საათამდე“, რომელიც გულისხმობს საღამოს 6 საათამდე ცხოველური პროდუქტებით მომზადებულ ერთ კერძზე უარის თქმას, 6 საათის შემდეგ კი ასეთი პროდუქტების მიღებას. სინამდვილეში ჯანმრთელობისათვის უკეთესი იქნება, თუ ცხოველურ პროდუქტებს დღის პირველ ნახევარში, ხოლო მცენარეულს საღამოობით მიირთმევთ.

სტატიაზე მუშაობდა : ნინი თოიძე

წყარო : vegnews.com