ავტომობილის ხილული გამონაბოლქვის შემოწმება ახალ ზელანდიაში ჯერ კიდევ 2006 წელს დაიწყო

• 2006 წლის ოქტომბრიდან მოყოლებული ახალ ზელანდიაში ავტომობილები ტექდათვალიერების გავლის დროს ხილულ გამონაბოლქვზე მოწმდებიან.
• ახალი ზელანდიის ნახშირორჟანგის ემისიების 40 პროცენტს ავტომობილები წარმოქმნის. ავტოპარკის უდიდეს ნაწილს კი კერძო ავტომობილები შეადგენს.
• გაუმართავი ავტომობილები 10-ჯერ უფრო მეტად აბინძურებს გარემოს, ვიდრე გამართული ავტომობილები.

2006 წლის ოქტომბრიდან მოყოლებული ახალ ზელანდიაში ავტომობილები ტექდათვალიერების გავლის დროს ხილულ გამონაბოლქვზე მოწმდებიან. იმისთვის, რომ დადგინდეს, გამოყოფს თუ არა ავტომობილი ხილულ გამონაბოლქვს, შემდეგ წესს იყენებდნენ – თუ მანქანას 5 ან მეტი წამის განმავლობაში ხილული გამონაბოლქვი აქვს მაღალ დატვირთვაზე მუშაობის დროს (2500 ბრუნი წამში), იგი დახარვეზდება.

ეს ცვლილება სამთავრობო პოლიტიკის ნაწილია, რომელიც ავტომობილების გამართულობის ხელშეწყობასა და ჰაერის ხარისხის გაუმჯობესებას ემსახურება.

ახალი ზელანდიის ნახშირორჟანგის ემისიების 40 პროცენტს ავტომობილები წარმოქმნის. ავტოპარკის უდიდეს ნაწილს კი კერძო ავტომობილები შეადგენს.

ნახშირორჟანგი არის სათბურის აირი, რომელიც კლიმატურ ცვლილებებს უწყობს ხელს და იგი ერთ-ერთი ყველაზე საზიანო აირია გარემოსთვის.

ავტომობილის გამონაბოლქვი ჯანმრთელობის არაერთი პრობლემის გამომწვევიცაა, მათ შორის ასთმა, გულის დაავადებები და ბრონქიტი. 2000 წელს ჩატარებული კვლევის მიხედვით, ახალი ზელანდიის 400-ზე მეტი მოქალაქის ნაადრევ სიკვდილს ავტომობილების გამონაბოლქვი იწვევდა, ამასთან ერთად, ეს პრობლემა სახელმწიფოს 442 მილიონი დოლარი უჯდებოდა ყოველწლიურად.

ავტომობილის მავნე გამონაბოლქვის დაახლოებით 40 პროცენტს მთლიანი ავტოპარკის მხოლოდ 10 პროცენტი წარმოქმნის. გაუმართავი ავტომობილები 10-ჯერ უფრო მეტად აბინძურებს გარემოს, ვიდრე გამართული ავტომობილები.

ახალი ზელანდიის ტრანსპორტის სამინისტროს ჰაერის გაუმჯობესების პროგრამა, გარდა ამ რეგულაციებისა, მოიცავდა კამპანიას ,,Choke the Smoke”, რომელიც მოუწოდებდა მძღოლებს ავტომობილის ძრავა მაქსიმალურად ნაკლებად დაეტვირთათ და შესაძლებლობის შემთხვევაში გადაადგილებულიყვნენ ფეხით ან ველოსიპედით.

სტატიაზე მუშაობდა : ნინი თოიძე

წყარო : www.beehive.govt.nz

აღნიშნული სტატია შექმნილია ევროკავშირის მხარდაჭერით. მის შინაარსზე სრულად პასუხისმგებელია ორგანიზაცია „ჩემი ქალაქი მკლავს“ და შესაძლოა, რომ იგი არ გამოხატავდეს ევროკავშირის შეხედულებებს

This article has been produced with the assistance of the European Union. Its contents are the sole responsibility of  the organization “My City Kills” and do not necessarily reflect the views of the European Union.