დაბინძურებულ ჰაერში დიდხანს ყოფნა ასუსტებს იმუნურ სისტემას

უახლესმა კვლევებმა დაადასტურა ჰაერის დაბინძურების უარყოფითი გავლენა ადამიანის ჯანმრთელობაზე.

აშშ-ის ერთ-ერთი წამყვანი ინსტიტუტის იმუნოლოგებმა გამოაქვეყნეს კვლევის შედეგი, რომლის მიხედვითაც დგინდება, რომ რაც უფრო დიდხანს იმყოფება ადამიანი დაბინძურებულ გარემოში, მით უფრო უარესდება მისი იმუნური ჯანმრთელობა.

გარდა იმისა, რომ ორგანიზმის ბუნებრივი უნარი – ებრძოლოს ინფექციებსა და სხვა გარემოებებს – დროთა განმავლობაში ისედაც სუსტდება, ამას აუარესებს დაბინძურებულ ჰაერში ცხოვრების ათწლეულები. დაბინძურებულ ჰაერში არსებული მყარი ნაწილაკები გროვდება ფილტვებთან დაკავშირებულ ლიმფური კვანძების იმუნურ უჯრედებში და საბოლოო ჯამში აქვეითებს მის ფუნქციას.

Nature Medicine-ში პირველად გამოქვეყნდა მტკიცებულებები იმისა, რომ რესპირატორული დაავადებების რისკი ასაკთან ერთად იზრდება, მათ შორის, არამწეველებში. მიუხედავად იმისა, რომ ეს თეორია ლოგიკურად ჟღერს, შედეგები მაინც მოულოდნელი აღმოჩნდა, რადგანაც მკვლევართა თავდაპირველი განზრახვა არა ჰაერის დაბინძურების გავლენის განსაზღვრა იყო იმუნურ სისტემაზე, არამედ ადამიანის ორგანოების ლიმფურ ქსოვილებში იმუნური უჯრედების შესწავლა.

„ადამიანის ლიმფურ კვანძებზე დაკვირვებისას გასაოცარი იყო შავი ფერის კვანძების რაოდენობა ფილტვებში, მაშინ როდესაც კუჭ-ნაწლავსა და სხვა სხეულის არეალებში ჩვეული ჩალისფერი კვანძები იყო“ – ამბობს პროფესორი დონა ფარბერი, კვლევის ავტორი.

„ფილტვებში შავი ლიმფური კვანძებისა და მათში არსებული მყარი ნაწილაკების აღმოჩენის შემდეგ, დავფიქრდით იმაზე, აქვეითებს თუ არა ისინი ფილტვის უნარს – ებრძოლოს ინფექციებს დაბერების ფონზე“ – დაამატა მან. კვლევაში გამოყენებულ იქნა 84 არამწეველი გარდაცვლილი პირის ქსოვილები, 11-დან 93 წლამდე.

სტატიაზე მუშაობდა : მარიამ სიხარულიძე და დეა კუსიანი

წყარო : airqualitynews.com

6 იანვარი 2023 წელი.