ჰაერის დაბინძურების ყველა „ცხელი წერტილი“ NCR-ის რეგიონში „მწვანე წერტილად“ გადაიქცევა

• გურუგრამში გამოვლინდა 18 ადგილი, როგორც სატრანსპორტო საშუალებებისა და გზებზე გადატვირთული მოძრაობის „ცხელი წერტილები“
• ზომები, რომელთა მიღებასაც მთავრობა გეგმავს, ჰაერის დაბინძურების „ცხელი წერტილების“ „მწვანე წერტილებად“ გადასაქცევად, არის გამწვანება, სამრეწველო და ტრანსპორტის გამონაბოლქვის კონტროლი, სამშენებლო და მყარი მასალების ნარჩენების მართვა

ჰარიანას მინისტრმა მანოჰარ ლალ ხათარმა განაცხადა, რომ ჰაერის დაბინძურების ყველა ”ცხელი წერტილი“ ეროვნული დედაქალაქის რეგიონში (NCR) ჰაერის დაბინძურებასთან საბრძოლველად „მწვანე წერტილად“ გადაიქცევა. გურუგრამში შტატის ჰაერის დაბინძურების კონტროლის საბჭომ გამოავლინა 18 ადგილი, როგორც სატრანსპორტო საშუალებებისა და გზებზე გადატვირთული მოძრაობის „ცხელი წერტილები“.

„დელის შემდეგ ესენია ყველაზე მეტად დაბინძურებული ზონები. ჩვენ მივიღეთ რამდენიმე ინიციატივა, რათა შევამოწმოთ ჰაერის ხარისხი NCR-ის (ინდოეთის რამდენიმე ქალაქის გაერთიანება, მათ შორისაა გურუგრამი) რაიონებში.

ჩვენ ასევე ვმუშაობთ, რათა ჰარიანაში შევამციროთ მოსავლის შემდგომი ნარჩენის წვა. ყველა ამ რაიონში ჩვენ გამოვავლინეთ დაბინძურების „ცხელი წერტილები“ და ვგეგმავთ, გადავაქციოთ ეს ადგილები „მწვანე წერტილებად“, – განაცხადა ხათარმა.

ამის შესახებ პრემიერმა გურუგრამში ჰაერის ხარისხის მართვის კომისიისა და NCR-ის  გარემოს დაცვის სამინისტროს მიერ ორგანიზებულ ორდღიან („დიალოგი სუფთა ჰაერის ინიციატივასთან დაკავშირებით“) საინაუგურაციო სხდომაზე გამოსვლისას განაცხადა.

ხათარმა თქვა, რომ ზომები, რომელთა მიღებასაც მთავრობა გეგმავს, რათა დაბინძურებული ჰაერის „ცხელი წერტილები“ გადააქციოს „მწვანე წერტილებად“, არის გამწვანება, სამრეწველო და ტრანსპორტის გამონაბოლქვის კონტროლი, სამშენებლო და მყარი მასალების ნარჩენების მართვა.

მთავრობის ოფიციალური პირების თქმით ჰარიანას 22 რეგიონიდან 14 (ანუ შტატის 60%-ზე მეტი) “NCR”-ში მდებარეობს.

მინისტრმა ასევე თქვა, რომ მთავრობამ უკვე შეიმუშავა პოლიტიკა, რომელიც ავალდებულებს ემისიის ონლაინმზომი მოწყობილობის დაყენებას NCR-ის რაიონის ყველა მრეწველობაში, რათა გააკონტროლოს სამრეწველო დაბინძურება. ეს მოწყობილობები დაკავშირებულია „დაბინძურების კონტროლის ცენტრალურ საბჭოსა“ და „ჰარიანას შტატის დაბინძურების კონტროლის საბჭოს“ სერვერებთან, სადაც ოფიციალური პირები დაბინძურების მონაცემებს ყოველდღე აკონტროლებენ.

NCR-ის გარემოს დაცვის მინისტრმა განაცხადა, რომ ამ რეგიონში დაბინძურების პრობლემის გადასაჭრელად ხელისუფლებამ ქალაქის ადგილობრივი გეგმების შემუშავებაზე უნდა გაამახვილოს ყურადღება.

“არავალის ქედი იცავს NCR-ის რეგიონს და საჭიროა მუშაობა არსებული ეკოსისტემის დასაცავად. ჩვენ ასევე უნდა ვიმუშაოთ მტვრის მართვის მიმართულებითაც გამწვანების ხელშეწყობის გზით. ამის მისაღწევად შესაძლებელია მიკროსამოქმედო გეგმების შემუშავება. ჩვენ აუცილებლად უნდა გავზარდოთ მწვანე საფარი სკოლებსა და ურბანულ ტერიტორიებზე,“ – თქვა იადავმა.

ავიკალ სომვაშმა, მდგრადი ქალაქების პროგრამის მენეჯერმა, თქვა: „გამწვანების აქტივობები ურბანულ ადგილებში მწვანე საფარის გასაზრდელად, ან მტვრის კონტროლის ღონისძიებებს, ნამდვილად შეუძლია, შეამციროს PM10-ის დონე. მაგრამ ჩვენ საქმე გვაქვს შედარებით მცირე ნაწილაკებთან, როგორიცაა PM2.5 და სხვა დამაბინძურებლები, მაგალითად: ოზონი, აზოტისა და გოგირდის დიოქსიდი. ეს ყველაფერი მომდინარეობს წვისა და სატრანსპორტო გამონაბოლქვიდან და არის კრიტიკული, რადგან ეს ფაქტორები აყენებს ყველაზე დიდ ზიანს ჯანმრთელობას. ამის გასაკონტროლებლად, აუცილებელია კონკრეტული გეგმის არსებობა, რათა წვის წყაროებისა და გაზრდილი საჯარო ტრანსპორტიდან გამონაბოლქვი გაკონტროლდეს. PM10-ის დონის დაწევა კარგია, მაგრამ საზოგადოებრივი ჯანმრთელობისთვის სარგებლის მოსატანად ასევე აუცილებელია, კონტროლდებოდეს PM2.5-ის დონე“.

სტატიაზე მუშაობდა : ანუკი კვეკვესკირი

წყარო : www.hindustantimes.com