მანქანების გამონაბოლქვი დაკავშირებულია ბავშვებში ასთმის 2 მილიონ შემთხვევასთან
- მსოფლიოში,, თითქმის 2 მილიონ ბავშვს უვითარდება ასთმა მანქანების გამონაბოლქვით დაბინძურებული ჰაერის სუნთქვის შედეგად.
- NO2-თან დაკავშირებული, დაახლოებით, 1,85 მილიონი ასთმის ახალი შემთხვევიდან ორი მესამედი ქალაქებშია დაფიქსირებული.
- მიუხედავად იმისა, რომ ქალაქებში ასთმის შემთხვევების რაოდენობამ ბოლო დროს იკლო, მკვლევრები აღნიშნავენ, რომ გაცილებით მეტია გასაკეთებელი მავნე გამონაბოლქვის შესამცირებლად.
ახალი კვლევის თანახმად, მსოფლიოში, თითქმის, 2 მილიონ ბავშვს უვითარდება ასთმა მანქანების გამონაბოლქვით დაბინძურებული ჰაერის სუნთქვის შედეგად.
ჯორჯ ვაშინგტონის უნივერსიტეტის მკვლევრებმა შეისწავლეს აზოტის დიოქსიდის (NO2) კონცენტრაციები, რომლებიც დაკავშირებულია მანქანების გამონაბოლქვთან და თვალყურს ადევნებდნენ ბავშვებში ასთმის ახალ შემთხვევებს 2000-2019 წლებში.
მათ აღმოაჩინეს, რომ NO2-თან დაკავშირებული, დაახლოებით, 1,85 მილიონი ასთმის ახალი შემთხვევიდან ორი მესამედი ქალაქებშია დაფიქსირებული.
მათ ასევე დაადგინეს, რომ ქალაქებში ასთმის შემთხვევების რაოდენობამ ბოლო დროს იკლო, 2000 წლის 20%-დან 2019 წლის 16%-მდე. მათი თქმით, ეს, დიდი ალბათობით, გამოწვეულია გამკაცრებული ჰაერის რეგულაციებით ისეთ უფრო მაღალ შემოსავლიან ქვეყნებში, როგორიცაა აშშ.
თუმცა, მკვლევრებმა ხაზგასმით აღნიშნეს, რომ ჰაერის დაბინძურება იზრდება სამხრეთ აზიაში, სუბ-საჰარის აფრიკასა და ახლო აღმოსავლეთში. შესაბამისად, გაცილებით მეტია გასაკეთებელი მავნე გამონაბოლქვის შესამცირებლად.
სიუზან ანენბერგმა, თანაავტორმა თქვა: „ჩვენმა კვლევამ აჩვენა, რომ აზოტის დიოქსიდი ბავშვებს ასთმის განვითარების რისკის ქვეშ აყენებს და რომ ეს პრობლემა განსაკუთრებით მწვავეა ქალაქებში.
”კვლევები აჩვენებს, რომ სუფთა ჰაერი უნდა იყოს იმ სტრატეგიის მნიშვნელოვანი ნაწილი, რომელიც მიმართულია ბავშვების ჯანმრთელობის შენარჩუნებაზე.
„წიაღისეულ საწვავზე მომუშავე ტრანსპორტის შემცირება შესაძლოა დაეხმაროს ბავშვებსა და მოზარდებს უკეთ სუნთქვაში და დიდი წვლილი შეიტანოს ისეთი პრობლემების მოგვარებაში, როგორიცაა პედიატრიული ასთმა და ჭარბი სიკვდილი. ამავდროულად, ეს, ასევე, შეამცირებს სათბური გაზების გამოყოფას და უფრო ჯანსაღ კლიმატს შექმნის“.
დაკავშირებული ახალი ამბების თანახმად, ბოლოდროინდელმა კვლევამ აჩვენა, რომ ბავშვებს, რომლებიც არიან სოციალურად დაუცველები ცხოვრების პირველ წლებში, აქვთ ასთმის გაზრდილი რისკი ზრდასრულ ასაკში.
სტატიაზე მუშაობდა : თეონა ქავთარაძე
წყარო : airqualitynews.com