რატომ იხოცებიან ფუტკრები

ბოლო წლებში ფუტკრის მასობრივი სიკვდილიანობის პრობლემაზე საერთაშორისო პრესაში ბევრს წერენ. კვლევებმა აჩვენა, რომ ფუტკრები სხვადასხვა მიზეზით იხოცებიან, თუმცა გამოიკვეთა რამდენიმე მიზეზი, რომელთა თანხვედრაც ფუტკრების მასიურ სიკვდილიანობას იწვევს.

თანამედროვე სოფლის მეურნეობა

სასოფლო-სამეურნეო დანიშნულების მიწის ფართობის შემცირებამ და მონოკულტურის თესვამ ფუტკრებისთვის ხელმისაწვდომი საკვები ერთფეროვანი გახადა. მრავალფეროვანი საკვები ეხმარება ფუტკარს უკეთ გაუმკლავდეს  დაავადებებს. ერთი სახეობის  კულტურა ფუტკრებისთვის ერთფეროვან საკვებს იძლევა. ყვავილობა ძირითადად მოკლე დროში მთავრდება, რის გამოც ფუტკრები საკვების გარეშე რჩებიან.

ასევე დიდ პრობლემას წარმოადგენს სოფლის მეურნეობაში პესტიციდების გამოყენება, რაც იწვევს არა მარტო თაფლის დაბინძურებას, ასევე უარყოფითად მოქმედებს ფუტკრების ნერვულ სისტემაზეც, აკარგვინებს მათ ორიენტაციისა და გამრავლების უნარს, ამცირებს მათი სიცოცხლის ხანგრძლივობას.

კლიმატის ცვლილება

ფუტკრების კვდომის ერთ-ერთ მიზეზად კლიმატის ცვლილებასაც ასახელებენ. ზამთარში თბილი პერიოდების ხანგრძლივობის გაზრდა, ადრეული ყვავილობა, ტემპერატურის უეცარი ცვალებადობა ის ფაქტორებია, რომლებიც უარყოფითად აისახება ფუტკრებზე.

გარდა ზემოთ ჩამოთვლილი მიზეზებისა, ფუტკრის სიკვდილიანობის ერთ-ერთ ძირითად მიზეზად ტკიპა ვაროაც ითვლება.

შესაძლო შედეგები

მცენარეების თითქმის 80 პროცენტი ფუტკრის, დარჩენილი 20 პროცენტის კი სხვა მწერების მიერ იმტვერება. ფუტკრების რაოდენობის შემცირება მსოფლიოში მოსავლის მკვეთრ კლებას გამოიწვევს.

ეკოლოგები მოგვიწოდებენ ვიზრუნოთ ფუტკრების კეთილდღეობაზე.

სტატიაზე მუშაობდა : მეგი წერეთელი და ნინი თოიძე

წყარო : https://www.bee-careful.com/de/initiative/bienensterben-ursachen-folgen/