როგორ აბინძურებს ტრანსპორტი ჰაერს .

გარდა  სათბურის აირებისა, ჰაერში ყოველდღიურად სხვა უამრავი ჰაერის დამაბინძურებლები წარმოიქმნება. მათ რიცხვს მიეკუთვნება მტვრის მყარი ნაწილაკები (PM) და აზოტის ოქსიდები (NOx),  რომლებიც, გარდა იმისა რომ საზიანოა ადამიანისა და ცხოველებისათვის, ასევე უარყოფითად მოქმედებს მცენარეულ საფარზე, აბინძურებს  წყალს, ნიადაგს და შენობა-ნაგებობებს.

სიტუაცია განსაკუთრებით კრიტიკულია გადატვირთულ და მჭიდროდ დასახლებულ ქალაქებში. მანქანების, სატვირთოების, ავტობუსების, ასევე სამშენებლო ტექნიკის და დიზელის ელმავლების გამონაბოლქვი იწვევს სასუნთქი და გულსისხლძარღვთა სისტემის დაავადებებს. მხოლოდ გერმანიაში,  2016 წელს, დაახლოებით 11 900 ადამიანი ნაადრევად გარდაიცვალა ჰაერში აზოტის დიოქსიდის მაღალი კონცენტრაციის შედეგად – ეს მაჩვენებელი თითქმის ოთხჯერ აღემატება, საგზაო შემთხვევების შედეგად გარდაცვლილთა რაოდენობას.

დიდ ქალაქებში ჰაერში აზოტის ოქსიდის მაღალი მაჩვენებლის უპირველეს მიზეზად დიზელის ძრავები სახელდება. 

გერმანის ქალაქებისთვის დადგენილია ჰაერის ხარისხის მაჩვენებლები, რომლის მიხედვითაც განსაზღვრულია ჰაერის დამაბინძურებლების დასაშვები რაოდენობა ჰაერში. გარდა ამისა განსაზღვრულია რა რაოდენობით შეიძლება დააბინძუროს ჰაერი ამა თუ იმ ტრანსპორტმა.

მიუხედავად იმისა, რომ სატრანსპორტო სექტორში სტანდარტები ბოლო წლების განმავლობაში გამკაცრდა, 2019 წელს მაინც ბევრ ქალაქში აღინიშნა აზოტის დიოქსიდის (NO2) ლიმიტის გადაჭარბება. სპეციალისტები ამას იმით ხსნიან, რომ სატრანსპორტო საშუალებების უმეტესობა გაცილებით მეტად აბინძურებს ჰაერს, ვიდრე ამას შესაბამისი ხელსაწყოები აფიქსირებენ.  გარემოს დაცვითი ორგანიზაციები ავლენენ ჰაერის დაბინძურების რეალურ მაჩვენებლებს და ატარებენ მიზანმიმართულ ღონისძიებებს, რათა ქალაქებში შეძლებისდაგვარად შენარჩუნდეს სუფთა ჰაერი და დაბინძურების მაჩვენებელი დასაშვებ ზღვარს არ აცდეს. განსაკუთრებული ყურადღება ექცევა დიზელზე მომუშავე ისეთ სატრანსპორტო საშუალებებს, რომლებიც განსაკუთრებით აბინძურებენ გარემოს.

წყარო : https://www.duh.de