თბილისის იპოდრომზე ცენტრალური პარკი გაკეთდება

ბიძინა ივანიშვილი და ფონდი “ქართუ” თბილისს იპოდრომის ტერიტორიას გადასცემს, სადაც ცენტრალური პარკი გაშენდება, – ამის შესახებ თბილისის მერმა კახა კალაძემ დღეს გამართულ ბრიფინგზე განაცხადა და პროექტის პრეზენტაციაც თბილისის საკრებულოში გამართა.

„დღეს დედაქალაქისთვის უმნიშვნელოვანესი დღეა, რადგან ბიძინა ივანიშვილი და ფონდი “ქართუ” თბილისს იპოდრომის ტერიტორიას გადასცემს, სადაც ცენტრალური პარკი გაშენდება”, – თქვა კალაძემ.

მისივე თქმით, ცენტრალური პარკის პროექტი, ასევე, “ქართუს” დაფინანსებით განხორციელდება.

ცნობისთვის: თბილისის ცენტრში 272,669 კვადრატულ მეტრზე მდებარე ძველი იპოდრომის ტერიტორია ბიძინა ივანიშვილს ეკუთვნის. 2020 წლის ივნისში ტერიტორია გაიყიდა თუმცა, ტერიტორიის ბენეფიციარი მესაკუთრე უცვლელი დარჩა და ის კვლავ ივანიშვილია. კერძოდ, საჯარო რეესტრის მონაცემებით, ბიძინა ივანიშვილის პანამური ოფშორის „ლაიმსთოუნ ფაინანს ინთერნეიშენელის“ შვილობილმა კომპანიამ, შპს ინვესტ კაპიტალმა 2020 წლის 16 ივნისს ძველი იპოდრომის ტერიტორია ასევე ბიძინა ივანიშვილთან დაკავშირებულ კომპანიაზე – “ა(ა)იპ საერთაშორისო საქველმოქმედო ორგანიზაცია ქართუზე” გაყიდა.

ბიძინა ივანიშვილი დედაქალაქის ცენტრში იპოდრომის მასშტაბის კიდევ რამდენიმე ობიექტს ფლობს, მათ შორისაა „ლაგუნა ვერეს“ და ყოფილი აბრეშუმის ფაბრიკის ტერიტორიაც.

წყარო : BM.GE