მარჯვენა სანაპიროზე ველობილიკის ნაწილი სამანქანე გზიდან ტროტუარზე გადაიტანეს
თბილისში, მარჯვენა სანაპიროზე, ავტომანქანების სავალ გზაზე მერიამ ველოსიბილიკის გამყოფი ხაზების ნაწილი წაშალა.
“ნეტგაზეთის” კითხვაზე, რატომ წაიშალა ველობილიკის ხაზები, მერიაში აცხადებენ, რომ სანაპიროზე ავტომანქანების ნაკადი საკმაოდ დიდია, ამიტომ, ველობილიკისთვის მონიშნულმა მონაკვეთმა ტროტუარზე გადაინაცვლა.
“მარჯვენა სანაპიროზე ველობილიკები არ გაუქმებულა, გადაინაცვლა ტროტუარზე. არსებულ მონაკვეთში ტროტუარის სიგანე იძლევა შესაძლებლობას, რომ დაიხაზოს ველობილიკი.
მარჯვენა სანაპიროზე ავტომანქანების ნაკადი არის საკმაოდ დიდი და სწორედ ამიტომ, მერიამ მიიღო გადაწყვეტილება, ველობილიკის აღნიშნული მონაკვეთი გადავიდეს ტროტუარზე”, — განმარტეს მერიაში.
მარჯვენა სანაპიროზე ველობილიკების დახაზვა მერიამ რამდენიმე თვის წინ დაიწყო, მოგვიანებით კი ავტომანქანების სავალ გზაზე ხაზების ნაწილი წაიშალა, ნაწილი კი ამ დრომდე რჩება ადგილზე.
წყარო : netgazeti.ge