ხეების სასარგებლო გავლენა ქალაქის მოსახლეობაზე
საცხოვრებელი ადგილის სიახლოვეში განლაგებულ გამწვანებას მრავალმხრივი პოზიტიური გავლენა აქვს ქალაქში მცხოვრებ ადამიანებზე და მათ ჯანმრთელობაზე
ერთ-ერთი კვლევის თანახმად, თუ თითო საცხოვრებელ სახლთან დამატებით ათ ხეს დავრგავთ, იქ მცხოვრები ადამიანები თავს შვიდი წლით გაახალგაზრდავებულად იგრძნობენ.
გულსისხლძარღვთა დაავადებების შემთხვევაში, თერთმეტი დამატებითი ხე საკმარისია იმისათვის, რომ დაავადებული ადამიანის სისხლძარღვები 1,4 წლით გაახალგაზრდავდეს.
ჩიკაგოს უნივერსიტეტის მკვლევარებმა ქალაქ ტორონტოში დაახლოებით 30 000 ადამიანის გამოკითხვის შედეგად დაადგინეს, რომ მეტად გამწვანებული უბნების მაცხოვრებლები არა მარტო უფრო ჯანმრთელად და ახალგაზრდულად გრძნობდნენ თავს, არამედ ისინი ნამდვილად ბევრად ნაკლებად ავადდებოდნენ დიაბეტით და გულსისხლძარღვთა დაავადებებით, ასევე იშვიათად აწუხებდათ არტერიული წნევაც.
ხეების რაოდენობის მცირედით ზრდაც კი საკმარისია მოსახლეობის ჯანმრთელობის გასაუმჯობესებლად. მკვლევარების აზრით, ეს ძალიან ბიუჯეტური და ეფექტური გზაა საკუთარი მოსახლეობის ჯანმრთელობაზე ზრუნვისთვის,ამასთანავე არ უნდა გამოგვრჩეს ისიც, რომ სკვერებთან ერთად, მნიშვნელოვან როლს თამაშობენ ცალკე მდგომი, უშუალოდ საცხოვრებელ სახლთან მდებარე ხეები. მკვლევარების აზრით, ასეთი ეფექტი გამოწვეულია ჰაერის ხარისხის გაუმჯობესებით. ცნობილია, რომ მტვრის მცირე ნაწილაკები და ჰაერის სხვადასხვა დამაბინძურებლები ხელს უწყობენ გულსისხლძარღვთა დაავადებების წარმოქმნას. გარდა ამისა, ხეებს ასევე შეუძლიათ სტრესის შემცირება და ხალხის მოტივაცია, რომ გადაადგილდნენ ფეხით – ეს კი თავის მხრივ აუმჯობესებს მათ ჯანმრთელობას.
სტატიაზე იმუშავა : მეგი წერეთელი – სალომე აბუაშვილი.
წყარო : www.bund-naturschutz.de