გზებზე მრუდე ბარიერებს შეუძლიათ ბავშვები ჰაერის დაბინძურებისგან დაიცვან

იმპერიალ კოლეჯის მკვლევრებმა შექმნეს მრუდე ბარიერები, რომლებსაც შეუძლია ხალხი და განსაკუთრებით ბავშვები დაიცვას დაბინძურებული ჰაერისგან.

ბავშვები ბინძური ჰაერის მიმართ მეტად მგრძნობიარე არიან მათი მიწასთან სიახლოვის გამო. ამ ფაქტზე დაფუძნებით დოქტორმა თილი კოლინსმა იმპერიალ კოლეჯის ეკოლოგიური პოლიტიკის ცენტრიდან დაიწყო გამოსავლის ძებნა.

კვლევების შემდეგ დოქტორმა კოლინსმა აღმოაჩინა, რომ ქვეითებისათვის განკუთვნილ გზაის მხარეს წარმოიქმნება ქარბორბალას მსგავსი ჰაერის მასა, რომელშიც ჰაერი, შესაძლოა, უფრო დაბინძურებული იყოს, რადგან მასში მომწამლავი ნაწილაკები გროვდება.

მარტივი მოდელების აწყობით დოქტორმა კოლინსმა შექმნა ქალაქისთვის განკუთვნილი დიზაინი, რომელიც შეამცირებს ამ მასების ეფექტს და გააუმჯობესებს ჰაერის ხარისხს ფეხით მოსიარულეებისთვის, განსაკუთრებით ბავშვებისთვის.

ავტოსტრადებზე მინდვრის გადამღობი ტიხრისა და ხმის დამხშობი კედლების შთაგონებით კოლინსმა და მისმა ჯგუფმა აღმოაჩინა, რომ კონსტრუქციის მრუდი აგებულება მეტად ეფექტურად ფანტავს დამაბინძურებელ ნივთიერებებს. ამ გზით შესაძლებელია ფეხით მოსიარულეთათვის მცირე დანახარჯებით ჰაერის გაუმჯობესება.

თუმცა მსგავსი ინვენტარით გზების აღჭურვას ისეთი გამოწვევები ახლავს თან, როგორიცაა, მაგალითად, გზაზე ხილვადობის შენარჩუნება. მკვლევრების თქმით, დამოკიდებულება ჰაერის ხარისხსა და ჯანმრთელობას შორის პირდაპირია და უკეთესობისკენ შეცვლილი სიტუაცია იძლევა საფუძველს ამ საკითხების ღრმა შესაწავლისა.

ჰაერის ხარისხის გარდა, მრუდე ბარიერებს შეუძლია შეამციროს ხმით დაბინძურება და იმოქმედოს როგორც ხარაჩო დიდ ქალაქებში მწვანე საფარის გასავრცელებლად.

დოქტორი კოლინსის თქმით, სხვადასხვა მეცნიერმა, ქალაქის დამპროექტებლებმა და არქიტექტორებმა უფრო აქტიურად უნდა ითანამშრომლონ ლოკალურად ჰაერის ხარისხის სწრაფად და ხარისხიანად გაუმჯობესებისთვის.

„დასაწყისში სხვების დარწმუნება, რომ პროექტში ჩართულიყვნენ, რთული იყო. პროექტის მთავარი მიზანია ავტომობილების მიერ წარმოქმნილი გამონაბოლქვის შემცირება, მაგრამ ასევე არსებობს სხვა გზები, რითიც შეგვიძლია დავიცვათ ჩვენი შვილები. ერთობლივი ძალისხმევით შესაძლებელი იქნება დაბინძურებული ჰაერით შექმნილი კრიზისული სიტუაციის განმუხტვა“.

სტატიაზე მუშაობდა : გიორგი შაქარაშვილი და ნინი თოიძე

წყარო : https://airqualitynews.com/2021/02/26/curved-road-barrier-could-protect-children-from-air-pollution/