ევროპის რესპირატორული საზოგადოება ევროპაში ჰაერის ხარისხის გასაუმჯობესებლად „გადამწყვეტ ქმედებას“ მოითხოვს

• ბრიუსელში ჩატარებულ კონფერენციაზე ევროპის რესპირატორულმა საზოგადოებამ ევროკავშირს ჰაერის ხარისხის გასაუმჯობესებელი გეგმა შესთავაზა;

• კონფერენციის მიზანი ევროკავშირში ჰაერის ხარისხის დირექტივის გადახედვა იყო;

• ევროკავშირს მსოფლიო ჯანდაცვის ორგანიზაციამ მის მიერ დაწესებული სტანდარტების ათვისებისკენ მოუწოდა.

„სუფთა ჰაერი ყველა ევროპელს!“ – ბრიუსელში ამ სახელწოდებით ჩატარებულ კონფერენციაზე ევროპის რესპირატორული საზოგადოების პროფესორმა ზორანა ანდერსონმა ევროპაში ჰაერის ხარისხის გასაწმენდად ევროკავშირს „გადამწყვეტი ქმედებისკენ“ მოუწოდა. მან ასევე ხაზი გაუსვა ჰაერის დაბინძურებიდან გამომდინარე სიკვდილიანობისა და დაავადებების რაოდენობას კონტინენტზე.

„ჰაერის დაბინძურება და კლიმატის ცვლილება ურთიერთგადაჯაჭვული პრობლემებია,“ – თქვა მან. „ჰაერის დაბინძურებისა და კლიმატის ცვლილების შემცირება ერთდროულად უნდა მოხდეს, რათა დავიცვათ ჩვენი ჯანმრთელობა“.

კონფერენციას ესწრებოდნენ საერთაშორისო ექსპერტები, პოლიტიკოსები და მეცნიერები, რომელთა შეკრების მიზეზი ევროკავშირის ჰაერის ხარისხის დირექტივის გადახედვა იყო. ამ დირექტივის მიზანია, ევროკავშირი 2050 წლისთვის გახდეს კლიმატურად ნეიტრალური. მათი მოთხოვნა შუალედური მიზნის დასახვაა, რათა 2030 წლისთვის დაბინძურების დონე მსოფლიო ჯანდაცვის ორგანიზაციის სტანდარტებს აკმაყოფილებდეს.

ევროპის რესპირატორულმა საზოგადოებამ ევროკავშირს დირექტივის სწრაფი ათვისების მეთოდი შესთავაზა, რათა 2050 წლისთვის ნულოვანი დაბინძურების მიზნის მისაღწევად მნიშვნელოვანი ნაბიჯები გადაედგათ. კერძოდ, ემოქმედათ, როგორც დირექტივის მიხედვით, ასევე მსოფლიო ჯანდაცვის ორგანიზაციის სტანდარტების მისაღწევადაც.

კონფერენციაზე განიხილებოდა შემდეგი საკითხები:

• გამონაბოლქვის დაბალი და მაღალი დონეების გავლენა ჯანმრთელობაზე;

• სხვადასხვა დამაბინძურებელი წყაროების გავლენა ჰაერზე;

• საუკეთესო პრაქტიკები ჰაერის ხარისხის წარმატებული კამპანიისთვის;

• ჯანმრთელობის ბენეფიტების მაქსიმალიზაცია ევროპასა და მის მიღმა.

მსოფლიო ჯანდაცვის ორგანიზაციის ჯანმრთელობის, გარემოსა და სოციალური საკითხების დეპარტამენტის დირექტორმა დოქტორმა მარია ნეირამ განაცხადა: „ჩვენ გვჭირდება, რომ ევროკავშირი ლიდერი გახდეს მსოფლიო ჯანდაცვის ორგანიზაციის სტანდარტების ათვისებაში. ვიცით, რომ ეს ამბიციური სურვილია, თუმცა, როგორ შეიძლება არ იყო ამბიციური, როდესაც საქმე ადამიანთა ჯანმრთელობის დაცვას ეხება?“

ევროპის პარლამენტის წევრმა ხავი ლოპესმა თქვა: „ჰაერის დაბინძურების შემცირება მრავალმხრივ მიდგომას მოითხოვს, რომელიც ყველა სექტორს მოიცავს, იქნება ეს პოლიტიკოსთა, მკვლევართა, ჯანდაცვის პროფესიონალთა თუ სამოქალაქო საზოგადოებათა გაერთიანება.

„ეს ბრძოლაა, რათა მოხდეს ადამიანთა სიცოცხლის სხვა საკითხებზე მაღლა დაყენება, რომელიც პოლიტიკურ სურვილს, საჯარო მხარდაჭერასა და ურყევ თავდადებას მოითხოვს.“

ვირჯინიეს სინკევიჩიუსმა, ევროპის გარემოს დაცვითი კომიტეტის წევრმა, ხაზგასმით განაცხადა: „მიუხედავად წინ გადადგმული ნაბიჯებისა, ჰაერის დაბინძურება კვლავ ერთ-ერთი ყველაზე მასშტაბური გამოწვევაა ჩვენი ჯანმრთელობისა და საზოგადოებისთვის. იგი არაპროპორციულად ახდენს გავლენას დაუცველ მოსახლეობაზე“.

„ჩვენ უნდა დავრწმუნდეთ, რომ ჩვენი კანონმდებლები კარგად იაზრებენ იმ მონაცემთა საფუძველსა და მასშტაბს, რომელიც ყველაზე უკეთ მოქმედებს დაბინძურების შესამცირებლად.“

კონფერენცია სუფთა ჰაერზე ევროპის რესპირატორულმა საზოგადოებამ (ERS) წარმართა ჯანმრთელობაზე ზრუნვის ინსტიტუტისა (HEI) და გარემოს ეპიდემიოლოგთა საზოგადოების (ISEE) პარტნიორობით.

სტატიაზე მუშაობდა: მარიამ სიხარულიძე, მარიამ ტატუაშვილი

წყარო: Airqualitynews.com

11 დეკემბერი 2023 წელი