აქცია ფონიჭალაში, ფეროს ქარხნის წინააღმდეგ

9 აპრილს ჩვენი მოძრაობის წევრები შევუერთდით ადგილობრივი მოსახლეობის აქციას ფონიჭალაში, რომელიც ეხება ფეროშენადნობთა ქარხნის მშენებლობას. მოსახლეობა ამ პროექტის წინააღმდეგ უკვე 3 თვეა იბრძვის. დღევანდელ აქციაზე 200-მდე მოსახლე იყო შეკრებილი, შეიქმნა საინიციატივო ჯგუფიც. ქარხნის მშენებლობა დასახლებული პუნქტიდან 150-200 მეტრის მოშორებით იგეგმება. „ჩემი ქალაქი მკლავს“ გუნდს ბოლო რამდენიმე წლის განმავლობაში 10 მშენებლობა აქვს გაჩერებული, შესაბამისად ადგილობრივ მოსახლეობას გავუზიარეთ ჩვენს ხელთ არსებული ინფორმაცია და ჩვენი გამოცდილება, რა საშუალებებით შეუძლიათ საკუთარი უფლებებისა და საზოგადოებრივი ნების დაცვა.

საკითხის შესახებ ინფორმაცია გააჩნიათ როგორც მშენებელი კომპანიის წარმომადგენლებს, ასევე საქართველოს გარემოს დაცვისა და სოფლის მეურნეობის სამინისტროს. კომპანიას ჰქონდა მცდელობა, რომ პროექტის გარემოზე ზემოქმედების შეფასების (გზშ) დოკუმენტი მოსახლეობისგან ფარულად წარედგინა განსახილველად. მოსახლეობამ ინფორმაცია დოკუმენტის განხილვის (რაც საჯარო პროცესია და მოქალაქეებს სრული უფლება აქვთ, დაესწრონ) შესახებ მხოლოდ ერთი დღით ადრე გაიგო, თუმცა საინიციატივო ჯგუფმა მაინც შეძლო შეხვედრაზე დასწრება და საზოგადოებრივი ნების წარდგენა. მოსახლეობისთვის არ არის მისაღები გზშ-ის დოკუმენტი ასეთი ფორმით. „ჩემი ქალაქი მკლავს“ გუნდის წევრებმა მივმართეთ გარემოს დაცვისა და სოფლის მეურნეობის სამინისტროს და მათი მხრიდან ჯერჯერობით არ დადასტურებულა ეს დოკუმენტი.

ჩვენ ვაპირებთ, რომ გავაგრძელოთ ამ პროცესში ჩართულობა მანამ, სანამ არ იქნება გათვალისწინებული მოსახლეობის აზრი და არ შეჩერდება ამ ქარხნის მშენებლობა, რომელიც უარყოფით ზეგავლენას ახდენს როგორც გარემოზე, ასევე ადამიანის ჯანმრთელობაზე.

სტატიაზე მუშაობდა : ნინი თოიძე

13 აპრილი 2023 წელი.