Volvo გეგმავს 2030 წლისთვის სრულად გადავიდეს ელექტრომობილების წარმოებაზე
ჰანჯოუში დაფუძნებული, Zhejiang Geely Holding Group-ის საკუთრებაში არსებულმა Volvo-მ განაცხადა, რომ 2030 წლისთვის, მისი ავტომობილების წარმოების ხაზი მთლიანად ელექტრო იქნება. ამით, კომპანია შეუერთდა იმ ავტომობილებთა მწარმოებლების მზარდ რიცხვს, რომლებიც აპირებენ საწვავზე მომუშავე ძრავების ამოღებას.
Volvo-მ განაცხადა, რომ 2025 წლისთვის მისი გლობალური გაყიდვების 50% ელექტრო მანქანები უნდა იყოს, დანარჩენი კი ნახევრად ჰიბრიდული მოდელები იქნება.
სხვა ავტო-მწარმოებელი კომპანიებიც ელექტრო მოდელების წარმოებაზე გადადიან, რათა CO2–ის ემისიების დადგენილი ზღვარი შეინარჩუნონ, მაგალითად Ford Motor Co.
”დარწმუნებული ვარ, რომ არცერთ მომხმარებელს აღარ ექნება სურვილი ბენზინის ძრავიანი მანქანა ჰყავდეს”, – განუცხადა ჟურნალისტებს Volvo-ს აღმასრულებელმა დირექტორმა ჰუკან სამუელსონმა.
შვედეთში დაფუძნებულ კომპანიაში აცხადებენ, რომ 2025 წლისთვის მათი გლობალური გაყიდვების 50% ელექტრო მანქანებზე უნდა მოდიოდეს, დანარჩენი კი ნახევრად ჰიბრიდულ მოდელებზე. Volvo უახლოესი რამდენიმე წლის განმავლობაშიაპირებს ელექტრო მანქანების ახალი სერიის შექმნას, რომელთა გაყიდვაც მხოლოდ ინტერნეტით იქნება შესაძლებელი.
კომპანიამ უკვე წარმოადგინა ამ სერიის პირველი მოდელი – C40 სრულად ელექტრო SUV, რომლის ელემენტის საწყისი დიაპაზონი დაახლოებით 420 კილომეტრია (261 მილი).
Volvo უზრუნველყოფს ახალი ელექტრო მოდელების უსადენო განახლებასა და ხარვეზების გამოსწორებას, ესაა მიდგომა, რომელიც თავდაპირველად ავტომობილების მწარმოებელმა კომპანია Tesla Inc.-მა გამოიყენა. ეს ნიშნავს, რომ C40-ის დიაპაზონი, დროთა განმავლობაში პროგრამული განახლებებით გაფართოვდება.
ავტომობილების მწარმოებლები აქტიურად ცდილობენ ნულოვანი გამონაბოლქვის მქონე მოდელების წარმოებაზე გადასვლას, რადგან ევროპასა და ჩინეთში ემისიების დადგენილი ზღვარი არ დაარღვიონ. ზოგიერთი ქვეყანა საწვავზე მომუშავე ავტომობილების მთლიანად აკრძალვას აპირებს.
გასულ თვეში, Ford Motor Co–მ განაცხადა, რომ 2030 წლისთვის მისი ევროპული ხაზი სრულად ელექტრო იქნება, ხოლო Tata Motors–ის საკუთრებაში არსებულმა Jaguar Land Rover–მაც დაანონსა, რომ 2025 წლისთვის მისი ძვირადღირებული Jaguar ბრენდი მთლიანად ელექტრო გახდება.
ნოემბერში, ძვირადღირებული ავტომობილების მწარმოებელმა Bentley-მ, რომელიც Volkswagen-ს ეკუთვნის, განაცხადა, რომ 2030 წლისთვის მისი ყველა მოდელიც ელექტრო იქნება.
ავტომობილების მწარმოებლებისთვის ელექტროფიკაცია საკმაოდ ძვირი ჯდება და რადგან ელექტრომობილებს ნაკლები მოძრავი ნაწილები აქვთ, ავტომობილების ინდუსტრიაში დასაქმება შემცირდება.
Volvo-მ განაცხადა, რომ რადიკალურად გაამარტივებს ახალი სერიის მოდელის დიზაინს და მომხმარებელს მისაღებ ფასებს შესთავაზებს.
მიუხედავად მსოფლიოში არსებული პანდემიით გამოწვეული კრიზისისა, რომელმაც ნახევარგამტარული ჩიპების მიწოდებაში დეფიციტი შექმნა და დროებით შეაჩერა მანქანათმშენებლობის პროცესები, მომწოდებლებთან მუდმივი კომუნიკაციის წყალობით, Volvo- ს წარმოებაზე ამას გავლენა არ მოუხდენია.
სტატიაზე მუშაობდა : მაია ბურდული და ანა კუხაშვილი
წყარო : https://www.weforum.org/agenda/2021/03/volvo-planning-fully-electric-2030/