როტერდამში ლიანდაგიდან გადასული მატარებელი ვეშაპის სკულპტურამ შეაკავა.
ნიდერლანდების ქალაქ როტერდამში გვიან ღამით მატარებელმა მეტროპოლიტენის ბოლო გაჩერებაზე შემაკავებელი ჯებირი გაანგრია და 10 მეტრი სიმაღლიდან ჩამოვარდნა ელოდა, რომ არა იქვე აღმართული ვეშაპის კუდის სკულპტურა, რომელმაც პირველი ვაგონი შეაკავა.
ადგილობრივი მედიის ცნობით, მეტროსადგურ დე აკერსზე მომხდარი ინციდენტისას არავინ დაშავებულა, რადგან იმ დროს მატარებელში მგზავრები არ იმყოფებოდნენ. რაც შეეხება მემანქანეს, მან საკუთარი კაბინიდან გადმოსვლა მოასწრო და არ დაზარალებულა. შემთხვევის ადგილის მახლობლად მცხოვრები მოსახლეობის განცხადებით, ისინი ღამით საშინელმა ხმაურმა გააღვიძა, ადგილზე მისულები კი უცნაური სანახაობის მომსწრენი გახდნენ – მათ თვალწინ, ვეშაპის კუდის ფორმის სკულპტურაზე ლიანდაგიდან გადასული ვაგონი იდგა.
ნიდერლანდელი მაარტენ სტრუიჯის მიერ შექმნილი სკულპტურა როტერდამში ჯერ კიდევ 2002 წელს დადგეს. ვეშაპის კუდი პლასტმასისგანაა დამზადებული, ამიტომ ყველასთვის მოულოდნელი იყო, რომ ის შემთხვევის შედეგად არ დაზიანდა. მატარებლის ვაგონი ამჟამად მყარად დგას, თუმცა ძლიერმა ქარმა, შესაძლოა, მისი ჩამოვარდნა განაპირობოს. არახელსაყრელი მდებარეობის გამო სატრანსპორტო საშუალების ჩამოღებას, სავარაუდოდ, დიდი დრო დასჭირდება, რადგან საჭირო ტექნიკის ადვილად მისადგომ ადგილზე განლაგება ვერ ხერხდება.
ჯერჯერობით უცნობია, რამ გამოიწვია მატარებლის ლიანდაგიდან გადასვლა. მიმდინარეობს გამოძიება, რომლის ფარგლებშიც სამართალდამცველების მიერ მემანქანის გამოკითხვა და კამერების ჩანაწერებისა თუ შავი ყუთის მონაცემების შესწავლა იგეგმება.
1როტერდამში მომხდარი ინციდენტის ამსახველი კადრები
- წყარო : popx.ge