ახალმა კვლევებმა აჩვენა რომ ორსულებისთვის დაბინძურებულ ჰაერთან შემხებლობა დაკავშირებულია ახალშობილთა ტვინის განვითარების შეფერხებასთან.
ეს პრობლემები უკავშირდება მიელინის, დამცავი გარსის განვითარებას, რომელიც ნერვულ ბოჭკოებს ფარავს და მოქმედებს როგორც იზოლატორი, რაც ტვინის უჯრედებს საშუალებას აძლევს სწრაფად და ეფექტურად იმოქმედონ.
როდესაც ამ გარსის განვითარება ფერხდება, ტვინის სიგნალები უფრო ნელა მოძრაობს, რაც გავლენას ახდენს ბავშვის სწავლასა და კოგნიტურ უნარებზე მისი განვითარებისთვის მნიშვნელოვან ეტაპზე.
თუმცა მეცნიერები ხაზს უსვამენ, რომ შეფერხება მიელინის გარსის ჩამოყალიბებისას ბავშვობის ადრეულ ეტაპზე ყოველთვის დამაზიანებელი არ არის. ზოგიერთი კვლევა ადასტურებს რომ ტვინის თავდაპირველი ნელი მომწიფება შესაძლოა დაკავშირებული იყოს მაღალ კოგნიტურ შესაძლებლობებთან შედარებით ზრდასრულ ასაკში, რადგან ტვინი აგრძელებს განვითარებას წლებთან ერთად.
კვლევა ჩატარდა ბარსელონაში და მის ფარგლებში გამოიკვლიეს 93 ახალშობილი, რომელთა დედებიც ხშირად დაბინძურებულ ჰაერს სუნთქავდნენ. ახალშობილებს ჩაუტარდათ კვლევა MRI ტექნოლოგიით დაახლოებით 1 თვემდე ასაკში, რათა გაეზომათ ე.წ. თეთრი ნივთიერება ტვინში, რაც ტვინის განვითარების მთავარი მაჩვენებელია. მკვლევარებმა აღმოაჩინეს რომ ბავშვებს, რომელთა დედებსაც ორსულობისას უფრო მაღალი შემხებლობა ჰქონდათ მტვრის ნაწილაკებით დაბინძურებულ ჰაერთან, ნერვული ბოჭკოების გარშემო ნაკლებად განვითარებული დამცველი ბარიერი აღმოაჩნდათ. ასევე დადგინდა, რომ ორსულობის ადრეულ ეტაპზე დაბინძურებულ ჰაერთან შემხებლობამ გავლენა მოახდინა ტვინის კორტექსზე, ხოლო ორსულობის ბოლოს, უფრო მეტად თეთრი ნივთიერების სტრუქტურა დააზიანა.
დელ მარის რადიოლოგიური დეპარტამენტის მკვლევარმა, Gerard Martínez-Vilavella-მა განაცხადა: ,,ჩვენი კვლევა ადასტურებს, რომ მიელინის ნივთიერების გამოყოფა, ნივთიერების, რომელიც ხელს უწყობს ტვინის განვითარებას და ტვინის მოწიფულობის საზომი ინდიკატორია, ნაკლბებად ვლინდება ახალშობილებში რომლებიც მუცლად ყოფნისას დაბინძურებულ ჰაერს მეტად ისუნთქავდნენ.”
პროფესორი Jesús Pujol, MRI დეპარტამენტის რადიოლოგიური ჰოსპიტალის ხელმძღვანელი ამატებს, რომ განვითარების ადრეულ ეტაპზე, ტვინის ცვლილებები არის საკმაოდ ვრცელი და კომპლექსური. როგორც ტვინის განვითარების შეფერხება ასევე ნაჩქარევი განვითარებაც შესაძლოა საზიანო იყოს ბავშვისთვის.
ეს კვლევა აჩენს ახალ, საინტერესო კვლევის სფეროს, რომელიც მიზნად ისახავს განსაზღვროს ტვინის განვითარების ოპტიმალური სიჩქარე ორსულობის დროს და გაგვაცნოს, როგორ შეიძლება დედა და პლაცენტა მოქმედებდნენ ეფექტურად ამ პროცესის დაცვისა და ოპტიმიზაციისთვის.
სტატიაზე მუშაობდა : თამარ გაბრიჩიძე