წმ. მიქაელ ტვერელის სახელობის ეკლესიის ჩაბეტონება

ჩვენ უკვე დიდი ხანია არაერთი თვალსაჩინო ფაქტიდან გამომდინარე ვიცით, რომ ორგანიზაცია „ჩემი ქალაქი მკლავს“ მხოლოდ ჩვენი ქვეყნისა და დედაქალაქის ეკოლოგიაზე არ ზრუნავს. მისი მისია საქართველოში სოციალური მდგომარეობის გაუმჯობესებაცაა. აქედან გამომდინარე, ეს ორგანიზაცია ყოველთვის ხალხის გვერდით დგას.

ერთ-ერთი ასეთი იყო გუშინ, 25 მარტს. „ჩემი ქალაქი მკლავს“-ის წევრები შეხვდნენ სოლომონ ზალდასტანიშვილის და 8 მარტის ქუჩების მაცხოვრებლებს. შეხვედრის მიზეზს წარმოადგენდა მშენებლობა, რომელიც როგორც ქალაქის იერსახეს, ისე მოსახლეობასაც აყენებს ზიანს. ასევე ზიანს აყენებს წმ. მიქაელ ტვერელის სახელობის ეკლესიასაც, რომელიც 110 წლისაა, კერძოდ, მშენებარე კორპუსი მდებარეობს ეკლესიაში შესასვლელის წინ, რაც ყოვლად დაუშვებელია ჩვენი რელიგიის მიხედვითაც. საინტერესო ფაქტია ისიც, რომ თვითონ სოლომონ ზალდასტანიშვილიც ამ ეკლესიაშია დაკრძალელული და ალბათ ის ყველაზე ცუდ სიზმრებშიც კი ვერ წარმოიდგენდა ასეთ რამეს.

ორგანიზაცია „ჩემი ქალაქი მკლავს“ თხოვს საპატრიარქოს გვერდში დგომას, გარდა ამისა, ითხოვს შეხვედრას მერიის არქიტექტურის სამსახურთან, ვინაიდან ძალიან საინტერესოა ის ფაქტი, თუ ვინ გასცა და როგორ გაიცა აღნიშნული მშენებლობის ნებართვა.

მაცხოვრებლებთან შეხვედრისას ასევე გაჩნდა ის გარემოებაც, რომლის მიხედვითაც საჩქაროდ განხილვის საგანს წარმოადგენს მომიჯნავე სახლების კედლების დროულად გამაგრება, ვინაიდან კელდები არის დაბზარული, რაც საფრთხეს უქმნის იმ მაცხოვრებლების სიცოცხლესა და ჯანმრთელობას, რომლებიც ასეთ სახლებში ცხოვრობენ.

ორგანიზაციის წევრების თქმით აქციები გაგრძელდება, ბოლომდე იდგებიან სოლომონ ზალდასტანიშვილისა და 8 მარტის ქუჩების მაცხოვრებლების გვერდით, თუმცა აქვე უნდა აღინიშნოს, რომ ეს არ არის მხოლოდ ამ ქუჩების მაცხოვრებლების პრობლემა, ეს თითოეული ჩვენთაგანის პრობლემაა.

სტატიაზე მუშაობდა : თაკო ყვავაძე