მერია ვაკეში ახალი გზის გაყვანას გეგმავს
ვაკეში ახალი გზის მშენებლობა იგეგმება. როგორც თბილისის მერმა კახა კალაძემ მთავრობის სხდომაზე განაცხადა, უკვე მიდის მუშაობა პროექტზე, რომლითაც ყიფშიძის ქუჩა ახალ გზას – ჭაბუა ამირეჯიბის გზატკეცილს შეუერთდება.
თბილისის მერის თქმით, აღნიშნული საკითხი მის მოადგილეს ირაკლი ბენდელიანს აქვს ჩაბარებული და იგეგმება პროექტის უახლოეს მომავალში მომზადება, ხოლო მომავალ წელს გზის მშენებლობის დაწყება.
„ვაკეში გვაქვს რამდენიმე ცხელი წერტილი, სადაც გადაადგილება საკმაოდ რთულია, მათ შორის არის ყიფშიძის ქუჩა, რომელიც ძალიან დატვირთულია და პიკის საათებში მთლიანად იჭედება. ვგეგმავთ ყიფშიძის ქუჩიდან ახალ გზაზე ჩამსვლელი გზის პროექტის განხორციელებას“, – განაცხადა კახა კალაძემ.
თბილისის მერის თქმით, გარდა ამისა, ყიფშიძის ქუჩაზე დგას ავტოფარეხები და თუ ადგილობრივების ნება იქნება, მუნიციპალიტეტი მზად არის, მათ ნაცვლად ადგილზე მოსახლეობისთვის და ბავშვებისთვის სასურველი სივრცეები განათავსოს.