ჰაერის დაბინძურების დონის შემცირებამ შესაძლოა ბავშვების მეხსიერება გააუმჯობესოს

ჰაერის დაბინძურების დონის შემცირებამ შესაძლოა გააუმჯობესოს ბავშვების  მეხსიერება და სწავლის უნარები – ეს დასკვნა გაკეთდა მსოფლიო სამოქმედო გეგმის (Global Action Plan), ფილიპსის ფონდისა და მანჩესტერის უნივერსიტეტის ახალი კვლევის საფუძველზე. მკვლევრებმა გამოაქვეყნეს კვლევის შედეგი,  რომლის მიხედვითაც ჰაერის დაბინძურების 20%-ით შემცირება ბავშვის მეხსიერებას 6%-ით გაზრდიდა.

ამჟამად, დაახლოებით 2000 სკოლა და საბავშვო ბაღი მდებარეობს ისეთ გზებზე, სადაც ჰაერის დაბინძურება ნიტროგენის ოქსიდის (NO2) დასაშვებ ნორმაზე მაღალია. ეს ნიშნავს, რომ სულ ცოტა 500,000 ბავშვის მეხსიერებას ჰაერის დაბინძურება საფრთხეს უქმნის.

პანდემიის დროს, როცა ყველაფერი დახურული იყო, ჰაერის დაბინძურების მაჩვენებელი დაახლოებით 40%-ით შემცირდა. ამის საფუძველზე მკვლევრებმა განაცხადეს, რომ ჰაერის დაბინძურების დონის 20%-ით შემცირება სავსებით შესაძლებელია.

სწრაფი მოქმედებისთვის კამპანიის ხელმძღვანელები მიმართავენ ცენტრალურ და ადგილობრივ მთავრობას, დაეხმარონ სკოლებს ახალი პროექტის – “სუფთა ჰაერი სკოლებისთვის” განხორციელებაში.

პროექტის სტრუქტურა მოიცავს უფასო ონლაინ ინსტრუმენტს, რომელიც მორგებულია მასწავლებლებზე, მშობლებსა და ადგილობრივი ხელისუფლების წარმომადგენლებზე. ეს ინსტრუმენტი მათ საშუალებას აძლევს იბრძოლონ ჰაერის დაბინძურების წინააღმდეგ სკოლაში და მის გარეთ.

კრის ლარჯი, აღმასრულებელი ხელმძღვანელი მსოფლიო სამოქმედო გეგმისა (Global Action Plan), ამბობს: “ერთწლიანმა კვლევამ გამოააშკარავა ის ზეგავლენები, რომლებიც აქვს ჰაერის დაბინძურებას ჩვენი შვილების მეხსიერებასა და ზოგადად, ჯანმრთელობაზე. ჩვენ აუცილებლად უნდა მივცეთ ყველა ბავშვს ბრძოლის შანსი, განსაკუთრებით მათ, ვინც დაბინძურების წერტილებში ცხოვრობს და ვინც შესაძლოა იყოს სხვა, უფრო დიდი პრობლემის, სიღატაკის მსხვერპლი.”

პროექტი “სუფთა ჰაერი სკოლებისთვის” უკვე უფასოდაა ხელმისაწვდომი, რათა დაეხმაროს ნებისმიერ სკოლას სუფთა ჰაერის გეგმის შესამუშავებლად, თუმცა პროექტის განსახორციელებლად  მხოლოდ სკოლების ჩართულობა არაა საკმარისი.  “ჩვენ ვთხოვთ მთავრობას, რომ შეკრიბოს  ყველა დაინტერესებული მხარე ერთად – არასამთავრობო ორგანიზაციები, ადგილობრივი მთავრობა, საგანმანათლებლო სფეროს ლიდერები და ბიზნესის წარმომადგენლები. დაინტერესებულ მხარეებს ექნებათ სამოქმედო გეგმა და პრობლემის გადაჭრის გზა. მათი ერთად შეკრებით გავაერთიანებთ ყველა იმ გზას, რომელსაც შეეძლება თავიდან აიცილოს ჰაერის დაბინძურება.”

წყარო : https://airqualitynews.com