ცხოველებისა და გარემოს დასაცავად ორმა მექსიკელმა მეწარმემ ტყავი კაქტუსისგან შექმნა

• ორმა მექსიკელმა ცხოველებისგან დამზადებული ტყავის ნაცვლად ეკომეგობრული, კაქტუსისგან წარმოებული ტყავი შექმნა.
• დღემდე კომპანიას შეუქმნია მანქანის დასაჯდომები, ფეხსაცმელი, ჩანთები და ტანსაცმელიც კი.

ტყავი თანამედროვე მსოფლიოს ერთ-ერთი გაყიდვადი პროდუქტია, მისი ინდუსტრია კი თანამედროვე ბაზარზე 80 მილიარდ დოლარს შეადგენს. თუმცა იქიდან გამომდინარე, რომ ტყავის დასამზადებლად ცხოველური პროდუქტი და მავნე ქიმიკატებია საჭირო, მისი წარმოება პრობლემურია არა მხოლოდ ცხოველთა უფლებების დამცველთათვის, არამედ ეკოლოგებისთვისაც. საბედნიეროდ, ორი მეწარმე მექსიკიდან მუშაობდა ისეთი ალტერნატივის მოფიქრებაზე, რომელიც იქნებოდა როგორც ეკო-მეგობრული, ისევე ექნებოდა ნამდვილი ტყავის შესახედაობა და სტრუქტურა. ალბათ გაინტერესებთ, რას იყენებენ ისინი თავიანთი ყალბი ტყავის დასამზადებლად. პასუხმა კი შეიძლება გაგაოცოთ.

ადრიან ლოპეზ ველარდემ და მარტე კაზარესმა განავითარეს მეთოდი, რომლის მეშვეობითაც კაქტუსისგან აწარმოებდნენ ვეგანურ ტყავს, რომელიც იმდენად რეალისტურად გამოიყურება, რომ ალბათ ვერასდროს მიხვდებოდით, რომ ის ამ უდაბნოს მცენარისგანაა წარმოებული. ისინი ამ ტყავს „დეზერტოს“ (Desserto) უწოდებენ და ამზადებენ იმ კაქტუსებისგან, რომლებიც მათ საკუთარ პლანტაციაში, მექსიკის შტატ ზაკატეკასში მოჰყავთ. კაქტუსი ცნობილია მისი უხეში, მყარი და სქელი კანით, რომელიც მას აქცევს ცხოველის ტყავის სიმულაციის საუკეთესო საშუალებად.

„ამ მცენარეის გამოყენების იდეა იმის გამო დაგვებადა, რომ მას არ სჭირდება წყალი გაზრდისათვის და ის მთელ მექსიკის რესპუბლიკაშია გავრცელებული. ასევე, სიმბოლურად, კაქტუსი ასახავს თითოეულ ჩვენგანს, მექსიკელებს, და ეს ყველამ იცის,“ თქვა ველარდემ. „გარდა ამისა, იმისათვის, რომ ჩავრთოთ ეს მასალა სხვადასხვა ინდუსტრიაში, საჭიროა მისი რაოდენობისა და მარაგის დათვლა. ჩვენ ამ დროისთვის გვაქვს 2 ჰექტარი მიწა,  სადაც მოგვყვავს ნოპალები (კაქტუსის სახეობა) და ასევე შეგვიძლია ამ მოცულობის გაზრდა 40 ჰექტარამდე. პროდუქციის მოცულობიდან გამომდინარე, ჩვენ გვაქვს 500000 ხაზოვანი მეტრი ყოველთვიურად.“

ორგანულად გაზრდილ კაქტუსს აჭრიან ფოთლებს, ასუფთავებენ, ჭყლეტენ და ტოვებენ მზეზე, რომ გაშრეს სამი დღის განმავლობაში გადამუშავებამდე. ამის შემდეგ ის შეიძლება გავაშროთ ბუნებრივად ადრიანო დი მარტის მიერ მოფიქრებული მეთოდებით. აქედან საბოლოოდ ვიღებთ ვეგანურ ტყავს, რომელიც სერტიფიცირებულია და შეუძლია გაუძლოს რეგულარულ გამოყენებას ათწლეულებითაც კი.

თუ ეს ყველაფერი არ იყო საკმარისი თქვენს დასაწრმუნებლად, გეტყვით, რომ ამ ტყავის ფასი თანაბარია ჩვეულებრივ ტყავთან მიმართებით. დღემდე კომპანიას შეუქმნია მანქანის დასაჯდომები, ფეხსაცმელი, ჩანთები და ტანსაცმელიც კი. იქიდან გამომდინარე, რომ ტყავი ორგანული მასალისგანაა შექმნილი, არის „სუნთქვადი“, რაც ზოგადად პრობლემაა სინთეტიკური ალტერნატივების შემთხვევაში. გარემოსთვის ასევე უპირატესობაა ისიც, რომ დესერტო ბიოდეგრადირებადია და არ შეიცავს რაიმე პლასტიკურ დანამატს. ეს ნამდვილი ალტერნატივაა იმ ცხოველური ტყავისა, რომელიც ჩვენს პლანეტას აზიანებს.

დღესდღეობით ბრენდი საკმაოდ წარმატებულია თანამედროვე ბაზარზე და დიდი ბიზნესების გარდა ეძებს გზებს, რომ გახადოს დესერტო მეტად ხელმისაწვდომი საშუალო და პატარა ბიზნესებისთვის.

სტატიაზე მუშაობდა : დეა კუსიანი

წყარო : mymodernmet.com