ფიჯი აცხადებს, რომ აზიის ყველაზე დიდ საფრთხეს არა კონფლიქტები, არამედ კლიმატური ცვლილება წარმოადგენს

• ფიჯის, ტონგასა და სამოას მსგავსი კუნძულები წყნარი ოკეანის აუზში ყველაზე მეტადაა საფრთხის ქვეშ კლიმატის ცვლილებით გამოწვეული ექსტრემალური ამინდის გამო
• ფიჯის ბოლო წლებში ტროპიკული ციკლონების სერიის გადატანა მოუწია, რამაც გამოიწვია დამანგრეველი წყალდიდობა, ათასობით ადამიანის მიგრაცია და ეკონომიკური პროცესების შეფერხება
• „ჩვენი არსებობის ყველაზე დიდი საფრთხე კლიმატის ცვლილებაა. ეს კრიზისული მდგომარეობა ეჭვქვეშ აყენებს ჩვენს იმედებსა და ოცნებებს კეთილდღეობის შესახებ“, – ფიჯის თავდაცვის მინისტრი ინია სერუირატუ

უსაფრთხოების ყოველწლიურ სამიტზე ფიჯის თავდაცვის მინისტრმა განაცხადა, რომ კლიმატის ცვლილება ყველაზე დიდ საფრთხეს წარმოადგენს აზია-წყნარი ოკეანის რეგიონში, რითაც შეცვალა საუბრის მთავარი თემა – უკრაინის ომი და ჩინეთსა და შეერთებულ შტატებს შორის დაძაბული ურთიერთობა.

ფიჯის, ტონგასა და სამოას მსგავსი კუნძულები წყნარი ოკეანის აუზში ყველაზე მეტადაა საფრთხის ქვეშ კლიმატის ცვლილებით გამოწვეული ექსტრემალური ამინდის გამო.

ფიჯის ბოლო წლებში ტროპიკული ციკლონების სერიის გადატანა მოუწია, რამაც გამოიწვია დამანგრეველი წყალდიდობა, ათასობით ადამიანის მიგრაცია და ეკონომიკური პროცესების შეფერხება.

„ჩვენს კონტინენტზე ტყვიამფრქვევების, გამანადგურებლების, ნაცრისფერი გემებისა და მწვანე ბატალიონების განთავსება არ არის ადამიანებისთვის უსაფრთხოების გარანტი“, – თქვა ინია სერუირატუმ, ფიჯის თავდაცვის მინისტრმა აზიის უსაფრთხოების სამიტზე.

„ჩვენი არსებობის ყველაზე დიდი საფრთხე კლიმატის ცვლილებაა. ეს კრიზისული მდგომარეობა ეჭვქვეშ აყენებს ჩვენს იმედებსა და ოცნებებს კეთილდღეობის შესახებ“.

სინგაპურში გამართულ შეხვედრაზე ძირითადი თემები გახლდათ რუსეთის შეჭრა უკრაინაში და მზარდი დაძაბულობა შეერთებულ შტატებსა და ჩინეთს შორის თითქმის ყველა საკითხის თაობაზე – ტაივანის სუვერენიტეტიდან დაწყებული, წყნარი ოკეანის საზღვაო ბაზებით დამთავრებული.

წყნარი ოკეანის კუნძულები რეგიონული დაძაბულობის ყურადღების ცენტრში მას შემდეგ მოექცა, რაც აპრილში ჩინეთმა ხელი მოაწერა უსაფრთხოების შეთანხმებას სოლომონის კუნძულებთან, რამაც შეაშფოთა შეერთებული შტატები, ავსტრალია და ახალი ზელანდია, რადგანაც ისინი წყნარ ოკეანეში პეკინის სამხედრო გაძლიერებას შიშობენ .

პეკინმა განაცხადა, რომ არ აარსებს სამხედრო ბაზას სოლომონის კუნძულებზე და რომ მისი მიზანია წყნარი ოკეანის კუნძულოვან ქვეყნებთან უსაფრთხოების საკითხზე მუშაობა.

ჩინეთის საგარეო საქმეთა მინისტრმა ვანგ იიმ გასულ თვეში ჩაატარა არაერთი შეხვედრა წყნარი ოკეანის კუნძულებზე ფართო რეგიონული ვაჭრობისა და უსაფრთხოების შეთანხმების უზრუნველყოფის იმედით, მაგრამ სახელმწიფოებმა შეთანხმებას ვერ მიაღწიეს.

სერუირატუმ ნაკლები ყურადღება მიაქცია წყარი ოკეანის აუზში ზესახლმწიფოების ძალების გადანაწილების საკითხს, ამავდროულად კი ხაზი გაუსვა ფიჯის პოზიციას რეგიონში არსებულ სახელმწიფოებთან თანამშრომლობის შესახებ.

,,ფიჯის არ ეშინია გეოპოლიტიკური შეჯიბრის, ჩვენ უნდა შეგვეძლოს გარემოებებთან ადაპტაცია სტაბილურობის მისაღწევად“, – აცხადებს იგი.

სტატიაზე მუშაობდა : ლილი ყვავილაშვილი და ნინი თოიძე

წყარო : www.nbcnews.com