პარიზის შეთანხმების გაგრძელების მთავარი მიზანი მეცხოველეობის გარემოზე უარყოფითი გავლენის შემცირებაა
- პარიზის შეთანხმება 2015 წელსაა მიღებული, მისი მთავარი მიზანია, რომ გლობალური ტემპერატურა 1.50C-ზე მეტად არ გაიზარდოს. დღესდღეობით შეთანხმებას დაახლოებით 190 ქვეყანა შეუერთდა.
- ახალი შეთანხმება მეცხოველეობით გამოწვეული პრობლემების გადაჭრას ემსახურება, მათ შორისაა ნიადაგის გამოფიტვა, გაუტყეურება, ჰაერისა და წყლის დაბინძურება, ოკეანეების მკვდარი ზონები, სათბურის აირების ჭარბი გამოყოფა.
- გარემოსადმი მიყენებული ზიანის აღსადგენად დასახული მიზნების მისაღწევად ჩამოყალიბებულია 3 ძირითადი პრინციპი: უარის თქმა, მიმართულების შეცვლა, აღდგენა.
მეცნიერების თქმით, კლიმატური ცვლილებების პროცესი უპრეცედენტო სისწრაფით ვითარდება. ბევრმა სხვადასხვა ორგანიზაციამ გარკვეული მიზნები და სტრატეგია დასახა გარემოზე უარყოფითი გავლენის შესამცირებლად. პარიზის შეთანხმება 2015 წელსაა მიღებული, მისი მთავარი მიზანია, რომ გლობალური ტემპერატურა 1.50C-ზე მეტად არ გაიზარდოს. დღესდღეობით შეთანხმებას დაახლოებით 190 ქვეყანა შეუერთდა.
ზემოხსენებული შეთანხმების ერთ-ერთი მთავარი ასპექტი საკვების ინდუსტრიაში პოზიტიური ცვლილებებისა და მეტი პასუხისმგებლობის დაკისრების ხელშეწყობაა.
ახალი შეთანხმება, რომელიც პარიზის ხელშეკრულების საფუძვლებზეა აგებული, მიზნად ისახავს კვების მრეწველობის, კერძოდ კი მეცხოველეობის, ადაპტირებას იმგვარად, რომ გარემოზე უარყოფითი გავლენა მაქსიმალურად შემცირდეს.
შეთანხმება მეცხოველეობით გამოწვეული პრობლემების გადაჭრას ემსახურება, მათ შორისაა ნიადაგის გამოფიტვა, გაუტყეურება, ჰაერისა და წყლის დაბინძურება, ოკეანეების მკვდარი ზონები, სათბურის აირების ჭარბი გამოყოფა.
ამ ყველაფრის მისაღწევად წახალისებულია ცხოველური პროდუქტების მოხმარების შემცირება, რაც შეთანხმების სამი ძირითადი პრინციპით მიიღწევა: უარის თქმა, მიმართულების შეცვლა, აღდგენა
უარის თქმა
უარის თქმის პრინციპი შეაჩერებს ვითარებას გაუარესებისგან. უარის თქმა ნიშნავს, რომ შეიზღუდება ცხოველებისა და თევზების ახალი ფერმების აშენება. ამის მთავარი მიზეზი კი ის არის, რომ შენარჩუნდეს ტყის საფარი, რომელიც ფერმის აშენების შემთხვევაში გაიჩეხებოდა.
მიმართულების შეცვალა
მეორე ძირითადი პრინციპი გულისხმობს ხელისუფლების გარემოსდაცვითი ორგანოების გულგრილი დამოკიდებულების შეცვლასა და საგანგაშო ეკოლოგიური მდგომარეობის გამოცხადებას, როგორც ეს 30-ზე მეტ ქვეყანაში ადგილობრივი ხელისუფლების 2,000-მდე ორგანოს შემთხვევაში მოხდა.
საკვებზე ხელმისაწვდომობა, გაჭირვება და შიმშილობა მთავარ საკითხებად უნდა იყოს მიჩნეული. სახელმწიფომ მეტად უნდა შეუწყოს ხელი მცენარეული პროდუქტების მოხმარების გაზრდას.
შეთანხმების მიხედვით, ხორცპროდუქტების წარმოებას დამატებითი გადასახადი უნდა ეკისრებოდეს, რომლის დახმარებითაც მიღებული თანხა მეცხოველეობით დაზიანებული ნიადაგისა და გარემოს განახლებას უნდა მოხმარდეს.
აღდგენა
აღდგენის პრინციპი მოიაზრებს ლოკალურად გავრცელებული მცენარეების დარგვას გამოფიტულ ნიადაგზე. ასევე, ურბანულ დასახლებებში მწვანე სივრცეების მომატებას სახურავების გამწვანების გზით.
დღესდღეობით არსებულ ზღვის ბინადართა დაცულ სივრცეებში უნდა აიკრძალოს თევზაობა და ამ არეალს საგანგებოდ დაცული ტერიტორიის სტატუსი მიენიჭოს.
მცენარეული საკვების ხელშეწყობის ეს შეთანხმება ძალაში 2021 წლის 31 აგვისტოს შევიდა. მისი წარდგენის ცერემონია მსოფლიო მასშტაბით 50-ზე მეტი ქალაქის მერიის შენობის წინ შედგა.
სტატიაზე მუშაობდა : ნინი თოიძე
წყარო : plantbasednews.org